A DEPO comeza a mellorar o firme da estrada EP-2601 entre Mos e Puxeiros

O deputado de Mobilidade Uxío Benítez asegura que a actuación mellorará a seguranza viaria na zona ao incluír un tratamento antiescorregadizo específico.
Publicado por o día 02/11/2017 na sección de Deputación de Pontevedra,Galicia,Mos

A DEPO comeza a mellorar o firme da estrada EP-2601 entre Mos e Puxeiros

A Deputación de Pontevedra vén de iniciar esta semana a mellora da capa de rodadura dun treito dun quilómetro na estrada provincial EP-2601 entre Mos e Puxeiros, no concello de Mos. Segundo explica o deputado de Mobilidade Uxío Benítez os traballos aumentarán a adherencia da vía grazas á extensión dunha nova capa de firme cun tratamento antiescorregadizo específico, acadando unha maior seguranza viaria para os usuarios.

A actuación na estrada entre Mos e Puxeiros vén dada despois de que os técnicos provinciais considerasen necesario realizar unha mellora da vía nun treito de 1.000 metros, entre os puntos quilométricos 2+000 e 3+000, debido aos problemas que presentaba o firme. O orzamento para facer estes traballos, que se contrataron de xeito conxunto con outras actuacións na provincia é de 53.259,94 euros. Unha vez estendidas todas as capas de aglomerado antiescorregadizo, repoñeranse as marcas viarias tan pronto como a climatoloxía o permita.

Este tipo de melloras e correccións dos asfaltados das estradas provinciais realizarase a partir de 2018 a través dun novo contrato marco, que permitirá axilizar as adxudicacións dos traballos de mantemento sen ter que pasar por un longo procedemento administrativo unha vez que se detectan as deficiencias (pavimentos escorregadizos, fendas, afundimentos ou peraltes defectuosos, entre outras).

Ese acordo marco para executar rehabilitacións de firmes nas estradas provinciais está en fase de licitación e ten un orzamento xeral de 4,4 millóns de euros para toda a provincia, dos que 802.313,15 euros corresponderán ao lote que englobará obras nos  concellos de Vigo, Nigrán, Baiona, Gondomar, Porriño, Salceda de Caselas, Mos, Redondela, Tui, Tomiño, Oia, O Rosal, A Guarda, Ponteareas e Salvaterra.