A Deputación incrementa este ano en case cen mil euros as axudas ás cooperativas agrogandeiras e ás confrarías de pesca e marisqueo da provincia

O goberno de Carmela Silva aprobará este venres as bases para as subvencións, “seguimos cumprindo o noso compromiso de fomentar o apoio aos sectores produtivos”
Publicado por o día 01/03/2018 na sección de Deputación de Pontevedra

A Deputación incrementa este ano en case cen mil euros as axudas ás cooperativas agrogandeiras e ás confrarías de pesca e marisqueo da provincia

A presidenta da Deputación de Pontevedra, Carmela Silva, anunciou hoxe en rolda de prensa que a Xunta de Goberno da institución provincial aprobará este venres as bases das subvencións ás confrarías e agrupacións de mariscadoras e as dirixidas a cooperativas agrogandeiras da provincia de Pontevedra para investimentos durante o 2018.

Así, entre as dúas liñas de subvencións, a Deputación de Pontevedra destinará un total de 440.000 euros ao sector primario da provincia. Nesta liña, a presidenta da institución provincial resaltou que “con estas axudas seguimos cumprindo cun compromiso que adquirimos cando tomamos posesión, que é o de fomentar o apoio aos sectores produtivos da nosa provincia” e que “aínda que non temos competencias a nivel económico consideramos que todas as administracións temos a obriga de promover os seus sectores produtivos, xa que o sector primario é o que garante que haxa actividade económica no mundo rural e no mariñeiro, é dicir, alí onde corremos o risco de despoboamento”.

En canto ás subvencións para as confrarías de pesca e asociacións de mariscadoras, Carmela Silva sinalou que “teñen un orzamento de 240.000 euros, o que supón un incremento de 40.000 respecto ao 2017” e tamén explicou que “con estas achegas queremos axudar a levar a cabo todas aquelas accións apoien as confrarías, a federación e as agrupacións de mariscadoras en proxectos e actuacións que teñan como obxecto: a comercialización e valorización das producións, a formación técnica e o asesoramento para o desenvolvemento da actividade das confrarías e a federación, a divulgación e posta en uso das novas tecnoloxías, as enerxías renovables e o aforro enerxético, material para a vixilancia das producións e investimentos para mellorar os servizos prestados.”

Poderán solicitar estas axudas as confrarías, a federación provincial e as agrupacións de mariscadoras da provincia de Pontevedra que estean legalmente constituídas e desenvolvan as súas actividades no ámbito territorial da provincia de Pontevedra. Sendo a porcentaxe subvencionable do orzamento de gastos financiables de entre o 20% e o 80%, sen prexuízo de que sexan compatibles con outras axudas recibidas doutros organismos.

Carmela Silva, sobre estas subvencións, tamén subliñou que “novamente a concesión establecerase a través de criterios claros e obxectivos tendo en conta o número de socias e socios, os postos de traballo derivados da axuda solicitada, o porcentaxe de mulleres que integren os órganos reitores da entidade solicitante, o adecuado cumprimento e xustificación de anteriores subvencións, a innovación do proxecto e o investimento en proxectos para mariscadoras.”

Sobre as bases reguladoras de subvencións dirixidas a cooperativas agrogandeiras para investimentos, a presidenta da Deputación de Pontevedra detallou que “contarán cun orzamento de 200.000 €, 50.000 € máis que o ano pasado”. A esta liña de subvencións poderán presentarse aquelas cooperativas agrogandeiras da provincia que estean legalmente constituídas e desenvolvan as súas actividades no ámbito territorial da provincia.

Silva detallou que “serán susceptibles de axuda todas aquelas accións destinadas á recuperación e posta en valor dos recursos agrarios endóxenos de carácter agrícola e gandeiro que teñan como obxecto a comercialización e valorización das producións; a formación técnica e asesoramento para o desenvolvemento de proxectos de investigación e innovación tecnolóxica; a posta en uso das novas tecnoloxías, enerxías renovables e aforro enerxético; e aqueles investimentos para mellorar os servizos prestados pola cooperativa ben para adquirir terreos para o aumento da base territorial das instalacións, ben para maquinaria ou obras, ben para adquirir equipos e sistemas informáticos”.

Para rematar, a Presidenta apuntou que “o prazo de solicitude dúas liñas de axudas será de 30 días naturais a partir do día seguinte da publicación da convocatoria no Boletín Oficial da Provincia de Pontevedra”.