Director Xeral de Augas asegura que a contaminación da Ría de Pontevedra non afecta á mortandade da ameixa e berberecho

O alto cargo da Xunta, Roberto Rodriguez, resposta así a unha pregunta de Carmen Santos, vicevoceira 2o do GP En Marea e secretaria xeral de PG, na que esta denunciaba a progresiva e alarmante diminución destes moluscos nos bancos da ría.
Publicado por o día 11/05/2017 na sección de Podemos,Política,Vigo

Director Xeral de Augas asegura que a contaminación da Ría de Pontevedra non afecta á mortandade da ameixa e berberecho

O director xeral de Augas da Xunta de Galicia, Roberto Rodríguez Martínez, afirmou hoxe na Comisión de Pesca do Parlamento que os índices de mortandade e de diminución de ameixa (fina e babosa) e de berberecho nos bancos marisqueiros da ría de Pontevedra non ten a ver coa contaminación senón “con causas naturais”, con fenómenos semellantes, na súa opinión, aos que se producen en todas as rías do país.

O director xeral respondeu deste xeito á pregunta realizada pola vicevoceira 2a do GP En Marea e secretaria xeral de Podemos Galicia, Carmen Santos, sobre a afección da contaminación da ría no marisqueo, así como sobre as previsións do Plan de Saneamento integral da mesma e os riscos de Ence e Elnosa para o sector.

Carmen Santos lamentou os argumentos ofrecidos polo representante do goberno e ironizou coa resposta, pois se a contaminación non ten nada que ver, dixo a deputada, cómo se entenden as sancións impostas pola Unión Europea ou os informes realizados por investigadores biólogos, que ratifican as críticas dos mariscadores e mariscadoras, que son os que sofren de forma directa, nos seus petos, nos seus postos de traballo, a diminución destes moluscos.

Santos lembrou que dende 2009 a 2016 a diminución de extración de ameixa babosa foi de algo máis do 88 por cento; a de ameixa fina de máis do 60 por cento e a do berberecho do 97 por cento.

Datos que non foron refutados polo director xeral, que recoñeceu que a evolución nestas especies era negativa pero asegurou que se compensaba co grande crecemento da ameixa xapónica.

Neste sentido, a parlamentar preguntouse se Roberto Rodríguez estaba a rirse da xente do mar, pois de todos é sabido que a ameixa xapónica é unha especie foránea que ten moitísima máis resistencia aos episodios contaminantes e ao transporte para manterse máis tempo viva nos restaurantes e viveiros que calquera das especies autóctonas.

Santos engadiu que, ademais, a Xapónica é de calidade moi inferior, cuns prezos, por tanto, máis baixos, dos que os mariscadores e mariscadoras son os principais perxudicados.

Para a deputada, tampouco é de recibo que o director xeral fale de que hai máis marisco porque hai máis carnets, “é como dicir que porque se sacan máis permisos de conducir iso xa é sinónimo directo de que hai máis coches circulando” ou parabenizarse de que melloran os prezos, que estes son máis altos, “porque tamén é unha obviedade que se hai menos marisco os prezos teñen que subir”.

Sobre o Plan integral de Saneamento da Ría, a vicevoceira de En Marea e secretaria xeral de PG, valorou que xa se estean facendo investimentos, “só faltaría cos cartos que chegan dos fondos Feder”, mais preguntou polo concepto de “inmediatez” que ten a Xunta, porque a depuración das augas da ría é unha asignatura pendente de anos.

Finalmente, Carmen Santos criticou que o director xeral non dera resposta sobre a responsabilidade de Elnosa e de Ence na contaminación, o que confirma, segundo dixo, que a Xunta é prisionera neste tema da “trama” de corrupción e de portas xiratorias que está a denunciar Podemos, con familias incluso de altos cargos da Xunta implicadas na trama, que anulan sancións á papelera.

A este respecto, aproveitou para lembrar que hai exactamente unha semana, un dos membros do comité de empresa de Ence daba conta de todas estas irregularidades e da contaminación xerada pola empresa nunha das primeiras paradas da ruta do Tramabús en Galicia. “Ás seis da tarde, tranquilos”, ironizou Santos, en alusión ás críticas falsas vertidas polo PP sobre a súa ausencia o pasado venres nunha comisión por estar no Tramabús.