Unha muller sofre diversas queimaduras cando trataba de apagar un incendio na súa cociña

Unha veciña de Vigo resultou ferida cando trataba de apagar un lume que comezou nunha tixola e afectou á súa cociña.

Ocorreu a última hora da tarde de onte nun domicilio situado na Rúa Quintela, a onde se desprazou un equipo médico para atender á muller con diversas queimaduras.

Segundo a información facilitada ao 112 Galicia, a veciña foi evacuada nunha ambulancia de Urxencias Sanitarias de Galicia-061 ao Hospital Povisa para ser atendida das lesións ocasionadas polo incendio, que se iniciou nunha tixola ao lume.

Ademais dos servizos médicos, ao lugar acudiron os Bombeiros de Vigo, malia que foi a propia afectada quen intentou sufocar as chamas.