Dous proxectos do Colexio de Formación Profesional Afundación distinguidos nos Premios Formación para Emprender

Publicado por o día 04/04/2019 na sección de Formación

Dous proxectos do Colexio de Formación Profesional Afundación distinguidos nos Premios Formación para Emprender

O Centro de Formación Profesional Afundación da Coruña foi galardoado con dous recoñecementos na pasada entrega dos XII Premios Formación para Emprender celebrada o pasado 28 de marzo no Fórum Metropolitano da Coruña. De entre un total de 15 proxectos innovadores de diferentes centros educativos, dous elaborados por estudantes do Centro de Formación Profesional de Afundación se situaron no segundo e cuarto postos.

«Alarm Baby» foi a proposta desenvolvida por Esther Caba Torres, Juan Cordonié Rodríguez, Estefanía Ortega Zambrano e Susana Varela Ares e merecedora do segundo premio. Este innovador proxecto consiste na creación e instalación de sensores en coches que activarán unha alarma sonora cando se esqueza un menor no interior do vehículo. Caso de que a alarma non sexa desactivada, o mecanismo instalado realiza unha chamada ao teléfono de contacto de referencia e, se non se detecta o retorno dunha persoa adulta, procédese automaticamente a contactar o 112.

«Coffee & Bike» é a idea na que traballaron Sandra García Feliú, M.ª Mar González García-Tizón e José Manuel Mariño Paz para potenciar dous principios fundamentais para a conservación da natureza: o consumo de alimentos ecolóxicos e a potenciación de medios de transporte non contaminantes. A súa proposta baséase en vender almorzos saudables, especialmente no ámbito das empresas. A partir de alimentos ecolóxicos, prepáranse pequenos almorzos ou parvas que se repartirían en bicicleta, xa fose a un domicilio particular ou local de traballo.

O segundo premio consistiu na entrega cada un dos estudantes dun smartwatch e dunha dotación de 300 euros para o centro para investir en material educativo, ademais dunha tableta.

Un dos piares das actividades educativas que se desenvolven en Afundación xira en torno ao respecto polo contorno e alicérzase en valores. Deste modo, os proxectos que resultaron distinguidos nestes XII Premios Formación para Emprender desenvolven este trazo fundamental, tanto ao se vincularen coa protección da infancia, no caso de «Alarm Baby», como coa da natureza, con «Coffee & Bike».