Dúas persoas resultaron feridas de consideración en senllos accidentes rexistrados en Padrón e Taboada

Publicado por o día 22/07/2020 na sección de Sucesos

Dúas persoas resultaron feridas de consideración en senllos accidentes rexistrados en Padrón e Taboada

O 112 Galicia rexistrou no escaso intervalo dunha hora dous accidentes de tráfico con feridos de consideración en Padrón e Taboada.

En ambos os dous sinistros foi requirida a presenza do equipo médico a bordo dos helicópteros medicalizados de Santiago e Ourense para facilitar a rápida evacuación dos afectados.

Eran as 15:30 horas cando sucedeu o primeiro dos dous accidentes localizado na AP-9 en sentido sur. Concretamente no punto quilométrico 87, un camión con bañeira saíuse da vía por un desnivel duns cinco metros. Como consecuencia do impacto, o condutor quedou atrapado no interior, o que obrigou a intervir aos equipos de excarceración do GES de Padrón e dos Bombeiros de Boiro.

Para facilitar o acceso ao ferido, primeiro foi necesario estabilizar a cabina do camión. Mediante esta acción, os bombeiros lograron as condicións de seguridade necesarias para sacar ao condutor e deixalo nas mans dos profesionais de Urxencias Sanitarias de Galicia-061, que tiñan a disposición o helicóptero medicalizado con base en Santiago para axilizar o traslado.

Da mesma maneira procederon no segundo accidente rexistrado no concello lucense de Taboada, onde, unha hora máis tarde, un octoxenario foi alcanzado por un turismo. A gravidade das lesións que presentaba motivaron a chegada do equipo médico a bordo do helicóptero con base en Ourense.

Cos efectivos de Urxencias Sanitarias de Galicia-061, colaboraron voluntarios de Protección Civil e axentes da Garda Civil.

Comentar noticia

Your email address will not be published.