Educación e a asociación Amicos colaboran en accións conxuntas no ámbito da discapacidade

O conselleiro Román Rodríguez e maila presidenta da Asociación, María Esther Vidal, asinaron o acordo para a posta en marcha de iniciativas específicas para o alumnado con discapacidade intelectual, autismo, parálise ou dano cerebral nos centros escolares
Publicado por o día 23/09/2018 na sección de Educación

Educación e a asociación Amicos colaboran en accións conxuntas no ámbito da discapacidade

A Consellería de Cultura, Educación e Ordenación Universitaria e a Asociación Amicos, colaborarán no deseño de accións conxuntas nos centros escolares para o alumnado con discapacidade intelectual, autismo, parálise ou dano cerebral, co obxectivo de lograr unha mellor atención a este colectivo.

O conselleiro Román Rodríguez e maila presidenta de Amicos, María Esther Vidal, asinaron o acordo segundo o cal o departamento educativo da Xunta comprométese a promover a formación permanente do profesorado que atende ao alumnado con discapacidade intelectual, trastorno do espectro do autismo, parálise ou dano cerebral; así como a colaborar na sensibilización e na difusión de materias e documentos que permitan un maior coñecemento das circunstancias específicas asociadas a estas circunstancias.

Pola súa banda, esta entidade sen ánimo de lucro aportará os seus coñecementos e a experiencia dos seus profesionais sobre as metodoloxías máis axeitadas, e tamén poderán colaborar directamente cos propios centros escolares.

Este acordo forma parte dunha das liñas estratéxicas da Consellería, que é a de traballar da man de diversas entidades e asociacións especializadas na atención a colectivos con necesidades educativas específicas para deseñar unha acción educativa integral ás súas peculiaridades e, deste xeito, avanzar nun sistema educativo máis inclusivo, que dea unha resposta acaída á diversidade do alumnado.

Cómpre lembrar que a Consellería de Educación e Amicos manteñen outras liñas de colaboración en materia de transporte e comedor.