En Marea anuncia que pedirá as comparecencias de Ana Pastor, José Blanco, Feijóo e Catalá na recén constituida comisión do Alvia

En Marea contará con dous membros na Comisión, Alexandra Fernández e Antón Gómez-Reino, que asumen a portavocía e formará parte da Mesa coa secretaría primeira.
Publicado por o día 18/04/2018 na sección de En Marea,Galicia,Política

En Marea anuncia que pedirá as comparecencias de Ana Pastor, José Blanco, Feijóo e Catalá na recén constituida comisión do Alvia

 En Marea ven de anunciar na constitución da Comisión de Investigación sobre o accidente ferroviario do Alvia que vai pedir as comparecencias de Ana Pastor, José Blanco, Alberto Núñez Feijóo, Iñigo Gómez de la Serna, Rafael Catalá e Julio Gómez-Pomar, entre moitos outros, para aclarar as causas do sinistro.

En Marea contará con dous membros nesta Comisión, Alexandra Fernández e Antón Gómez-Reino, que asumen a portavocía no caso de Fernández e formará parte da Mesa coa secretaría primeira, no caso de Gómez-Reino.

“Por fin está en marcha a comisión de investigación do Alvia. Quero agradecer o traballo da Plataforma de vítimas, porque levan case 5 anos loitando para que a Comisión sexa unha realidade. Cómpre recoñecer o seu traballo”, sinalaron os deputados, que destacaron que dentro do Congreso, “En Marea foi o principal artífice de que esta comisión saíse adiante, a pesar de que a bloquearon en repetidas ocasións ou se intentou que a presidencia a asumisen membros afíns ao PP, con responsabilidades políticas”.

A deputada Alexandra Fernández asegurou que En Marea estará “vixiante” para que se faga xustiza e que non se intente bloquear de novo.

“Traballaremos para que sexa unha Comisión operativa e se consiga coñecer toda a verdade. Seremos a garantía dentro da comisión”, sinalou a deputada.

PREGUNTA-RESPOSTA

A deputada tamén avanzou que En Marea plantexará que a metodoloxía sexa pregunta-resposta.

“Apostamos polo diálogo cos comparecentes. Non queremos que veñan a comparecer cun guión xa definido. Queremos un debate real para que haxa xustiza e reparación para as vítimas”, sinalou, destacando que outro dos obxectivos da Comisión será “mellorar as condicións de seguridade do sistema ferroviario”.