En Marea insta a traballar con seriedade e rigor para que a comisión que investigará no Parlamento o acontecido na última edición do Marisquiño sirva para garantir a protección da cidadanía e non se convirta en instrumento dos intereses electoralistas de PP e PSOE. Así o indica a vicevoceira do grupo parlamentario, Carmen Santos; que este martes se trasladou ata Vigo para reunirse coa Plataforma de Afectados do accidente, xunto ao voceiro da Marea de Vigo, Rubén Pérez, e o edil Xosé Lois Jácome.

“Falamos dunha cuestión moi seria, pois non se trata de algo que afecte unicamente aos vigueses e viguesas”, indica a vicevoceira do grupo parlamentario de En Marea, que destaca a necesidade de realizar unha análise exhaustiva do acontecido, así como do marco lexislativo aplicable, para que algo similar non volva acontecer no futuro en ningún espectáculo.

Á espera de coñecer os resultados da investigación para poder falar de responsabilidades, En Marea denuncia a intolerable actitude con que PSOE e PP están a enfrontar o acontecido, “centrados en ataques e en facer electoralismo en lugar de asumir responsabilidades” e esclarecer feitos. “ Queremos ter toda a información para poder poñer solucións ás deficiencias sobre o que aconteceu en Vigo, e podería ter acontecido noutro espectáculo ou evento de Galicia”, indica a vicevoceira do grupo parlamentario de En Marea.

Nesa liña, Carmen Santos denuncia a “práctica antidemocrática e perniciosa” que supón que PP e PSOE  empreguen as súas respectivas maiorías “para pasar o rodillo ás iniciativas de interese para a cidadanía”. Un exemplo do nulo interese que ambas formacións teñen na defensa do interese xeral, tal e como demostra que  ambas “defensan unha cousa no Concello e outra no Parlamento”.

“Esta ten que ser unha comisión que defenda os intereses da maioría da cidadanía. Non para as maiorías absolutas do PP nin de Abel Cabellero. É necesario saber a verdade, e ter toda a información para poder efectuar unha valoración política axeitada. Non permitilo é unha anomalía inaceptable”, denuncia a vicevoceira de En Marea, que lamenta os vetos que ambas formacións xa están a impoñer no deseño do plan de traballo da comisión de investigación parlamentaria. “Vétase ao voceiro da Marea de Vigo, pero curiosamente a voceira do PP no Concello si está no Plan de Traballo da Comisión de Investigación. É vergoñento”, conclúe Carmen Santos. Que tamén destaca o bloqueo da comparecencia da Asociación de Vítimas que solicitara En Marea.

O grupo municipal da Marea de Vigo tamén fixo certas aportacións cara á Comisión de Investigación do accidente do Marisquiño, tales como solicitudes para comparecencias ou sobre documentación que considera debería ser aportada e valorada nesa Comisión.

“As comisións de investigación deben ser espazos de traballo onde dirimir responsabilidades e traballar para poñer as medidas necesarias para poder evitar ao máximo accidentes coma o do Marisquiño. Non deben ser utilizadas como armas políticas”, destaca Rubén Pérez.

Noticias Vigo

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.