📣En Marea esixe a Fomento que corrixa a toponimia deformada da súa páxina web: "El Ferrol", "Sanjenjo", "Lage", "Bayona", "La Guardia"

A deputada de En Marea no Congreso, Alexandra Fernández, diríxese ao Ministerio de Fomento mediante unha iniciativa parlamentar para esixirlle que corrixa de imediato a toponimia de Galicia deformada na súa páxina web que utiliza denominacións do tipo: “El Ferrol”, “Bayona”, “Sanjenjo”, “La Guardia”, “Lage”, “El Grove”, “Puebla del Caramiñal”, “Santa Eugenia de Ribeira” ou “Isla de la Toja”.

Fernández traslada o seu estupor pola falta de respecto do Ministerio ás normas establecidas en materia lingüística. “Na web de Fomento, na sección de Marítimo, e pulsando as Capitanías Marítimas, vemos na relación de Capitanías e Distritos Marítimos, como se usan formas toponímicas totalmente esperpénticas, incluso propias da ditadura de Franco como é o caso de “El Ferrol”.

Envíen o nomenclátor oficial de Galicia a todo o Ministerio

A parlamentar de En Marea reclama a Fomento que use as formas toponímicas oficiais: Laxe, Ferrol, Baiona, A Guarda, Santa Uxía de Ribeira, Pobra do Caramiñal, O Grove, Illa da Toxa e Sanxenxo.

Fernández pide que se remate definitivamente con este tipo de situacións e que Fomento proceda a realizar unha revisión a fondo da web, da documentación e de anuncios porque son habituais os incumprimentos nesta materia. “Debería remitir a todos os organismos do Ministerio e a toda a súa estrutura o nomenclátor oficial de Galicia que está recollido na páxina web da Xunta como a forma de evitar as deformacións da nosa toponimia”.