En Marea presenta unha Proposición de Lei relativa á regulación tributaria das persoas pensionistas emigrantes retornadas

Nesta iniciativa establécese un mecanismo de homologación automático das pensións de incapacidade percibidas do estranxeiro
Por o 26/03/2018 | Sección: En Marea,Política
En Marea presenta unha Proposición de Lei relativa á regulación tributaria das persoas pensionistas emigrantes retornadas

A deputada de En Marea, Yolanda Díaz, participou no rexistro dunha Proposición de Lei relativa á situación das persoas pensionistas emigrantes retornadas, unha situación na que se atopan moitos galegos e galegas.

En Marea plantexa unha reforma normativa que evite as continuas sancións aos emigrantes retornados polo pago do IRPF e que devolva, de oficio, as cantidades abonadas en concepto de demora, recargos ou multas por este concepto, así como para que homologue de xeito automático as pensións de incapacidade percibidas do estranxeiro para que as persoas afectadas poidan beneficiarse das exencións previstas na Lei de IRPF.

A deputada Yolanda Díaz definiu como “inxusta” a situación que están a vivir os emigrantes retornados, “miles de pensionistas que non teñen máis rendas que as pensións xeradas co seu traballo, e que en ningún momento tiveron o máis mínimo afán defraudatorio, simplemente foron mal informados pola Administración”.

Asemesmo, deberíase establecer un mecanismo de homologación automático das pensións de incapacidade percibidas do estranxeiro para que os beneficiarios das mesmas podan aplicar directamente as exencións previstas na Lei de IRPF, sen necesidade de acudir a complexos e longos procedementos administrativos e xudiciais.

Esta inxusta situación que afectaba a miles de pensionistas que non teñen máis rendas que as pensións xeradas co seu traballo, que en ningún momento tiveron o máis mínimo afán defraudatorio, que foron mal informados pola Administración e aos que se lles esixe con carácter retroactivo e acumulado unha tributación ao tipo de gravame ordinario, máis os intereses e sancións resulta especialmente sanguenta por coincidir no tempo, como sinala Yolanda Díaz, coa aprobación por parte do Goberno dunha amnistía fiscal para persoas de rendas elevadas, que durante anos deixaron de tributar en España de forma consciente e voluntaria e que se viron beneficiadas pola posibilidade de regularizar a súa situación a un tipo de interese mínimo e contando para iso co asesoramento da Administración Tributaria. Unha amnistía fiscal, por certo, que foi declarada inconstitucional polo Tribunal Constitucional.