En Marea reclama que todas as comercializadoras poidan ofrecer o Bono Social Eléctrico

Francisco Casal denuncia que a reforma do PP de 2017 deixou fóra ao 75% das familias que se beneficiaran del con anterioridade
Publicado por o día 24/10/2018 na sección de En Marea,Política

En Marea reclama que todas as comercializadoras poidan ofrecer o Bono Social Eléctrico

En Marea insta ao goberno central a efectuar as modificacións precisas para deixar sen efecto a reforma do Bono Social Eléctrico efectuada polo Partido Popular no 2017. Unha modificación que supuxo vetar o acceso ao mesmo do 75% dos usuarios que viñan beneficiándose del; e que supón agravar máis aínda o risco de pobreza enerxética que xa padece unha elevada parte da poboación de Galicia e do estado.

En Marea solicita que calquera empresa comercializadora de enerxía que así o desexe poida ofrecer aos seus clientes o Bono Social Eléctrico. Algo lóxico que, sen embargo, dista moito da realidade actual. E é que a reforma impulsada polo ministro do PP Álvaro Nadal supuxo limitar a posibilidade de ofrecelo a unicamente oito empresas comercializadoras.

“O novo bono chegou de momento a 715.000 fogares en España, unha porcentaxe ridícula ante a magnitude do problema. Do que non se fala é de que só poden solicitalo as persoas que contraten a luz cunha comercializadora de referencia, é dicir, nunha do oito empresas que operan en España nesta categoría, entre as que están as cinco do oligopolio, na súa versión regulada: Naturgy, Endesa, Iberdrola, Viesgo, EDP; CHC e as comercializadoras de Ceuta ou Melilla. Non hai máis”.

Segundo datos do Ministerio de Transición Ecolóxica, a mediados deste verán só 715.000 usuarios puideran acollerse ao novo bono, fronte aos 2,4 millóns de clientes que eran beneficiarios do antigo. Datos que supoñen “a brutal evidencia da penosa política do goberno do Partido Popular en materia de pobreza enerxética”, tal e como destaca o deputado Francisco Casal.

Os últimos datos falan de que máis de 400.000 persoas en Galicia e 4,6 millóns de persoas residentes no estado español non foron capaces de manter a súa casa quente durante os meses de frío. E indican que case 600.000 cidadáns galegos e 6,8 millóns de españois sufriron temperaturas inadecuadas na súa vivenda, atrasos no pago de recibos ou ambas situacións.

“Que pasa cos mais de 600.000 de clientes do mercado libre en Galicia e 15 millóns no conxunto do estado? Que pasa coas persoas que teñen a luz con algunha das 728 comercializadoras que non son de referencia? Pois que están excluídas do Bono Social e de toda protección contra o corte de subministración”, tal e como destaca Francisco Casal.

En Marea destaca que a definición de consumidor vulnerable propiciada polo Partido Popular supuxo vincular esa categoría ao nivel de renda, pero tamén á compañía coa que este ten contratada a enerxía eléctrica. “Con iso, só son suxeitos de dereito fronte a posibles cortes os clientes das comercializadoras de referencia”, indica o deputado. Que insta á ministra Teresa Ribera a non continuar nesa senda e a impulsar as modificacións precisas para que ningunha persoa que o precise se vexa excluída do Bono Social.

“O principio de precaución implica que a empresa non poida cortar o suministro sen antes comprobar se o titular está en situación de vulnerabilidade. Aplicará a ministra de Transición Ecolóxica o principio de precaución a todas as familias, ou deixará fóra aos 600.000 cidadáns galegos das comercializadoras do mercado libre?”, inquire o deputado de En Marea.

Por último, a formación propón que se modifique o xeito de calcular a aportación que as empresas realizan ao Bono Social. De xeito que, en lugar de realizarse en función do número de clientes, pase a efectuarse atendendo ao volume total de negocio, “incluindo a producción e a distribución, ademais da comercialización nas que teñen integración vertical. Con iso, ademais de chegar á poboación excluída, evitaríase o transvasamento de clientes ás empresas do oligopolio e fomentaríase a competencia no sector”.

A definición actual impide que as cooperativas sociais enerxéticas sen ánimo de lucro, que comercializan só enerxía renovable e apostan pola democratización da enerxía, queden excluídas do Bono Social. Unha incongruencia que En Marea ve necesario atallar para conseguir que o acceso ao nomeado bono deixe de ser incompatible con ter a luz contratada cunha empresa ética, que non practique o perverso xogo das portas xiratorias.

Comentar noticia

Your email address will not be published.