En Marea traslada as demandas galegas nunha xuntanza co director xeral para a Memoria Histórica

Publicado por o día 31/10/2018 na sección de En Marea,Política

En Marea traslada as demandas galegas nunha xuntanza co director xeral para a Memoria Histórica

O voceiro de En Marea no Congreso, Antón Gómez-Reino, e a deputada Yolanda Díaz, mantiveron este martes unha xuntanza co Director xeral para a Memoria Histórica, Fernando Martínez López, para trasladarlle as demandas galegas a este respecto.

“Estamos satisfeitos coa xuntanza. Unha das demandas principais foi pedir ao Goberno que se posicione na demanda xurídica para devolver o Pazo de Meirás á cidadanía galega. É unha reivindicación imprescindible para En Marea e para Galicia”, asegurou Gómez-Reino.

Pola súa banda, a deputada Yolanda Díaz asegurou que o director xeral para a Memoria Histórica comprometeuse con En Marea a intentar poñer en marcha “catro medidas que son moi importantes” para este grupo:

“A nulidade de todos os crimes franquistas en Galicia foi a primeira das medidas que solicitamos, e comprometeuse a revisalo, tal e como aconteceu con Catalunya”, explicou Díaz.

A seguinte das medidas importantes para En Marea é cambiar o nome do Centro de Educación Infantil e Ensinanza Secundaria Obrigatoria Salvador Moreno de Pontevedra, adscrito ao Ministerio de Defensa.

“Moreno foi un dos primeiros militares golpistas que axudou a Franco no 1936, e atribúese á súa figura unha sanguinaria participación na represión posterior. Non hai excusas, ningún colexio público pode seguir con ese nome”, asegurou Díaz, que afirmou que Martínez se mostrou favorable a este cambio.

A terceira cuestión foi solicitar a “ilegalización da Fundación Francisco Franco” porque as fundacións dependen do Ministerio de Educación e En Marea pide que se “investiguen as declaracións dos responsables da fundación, que fan apoloxía da ditadura”.

Finalmente, a deputada destaca os letreiros das estradas, onde moitos seguen con nomenclatura franquista, como é o caso de “Juan Canalejo” na Coruña ou as rúas de mandos franquistas no interior de Navantia en Ferrol, algo que depende de Defensa.

“O Director xeral para a Memoria Histórica mostrouse moi favorable a investigar estas propostas de En Marea e comprometeuse a dar unha resposta en breve”, explicaron os deputados.