Esquerda Unida denuncia a desidia do PP ante o incremento da sinistralidade laboral na que Galicia encabeza as cifras do Estado

Publicado por o día 28/02/2017 na sección de Esquerda Unida,Política,Vigo

Esquerda Unida denuncia a desidia do PP ante o incremento da sinistralidade laboral na que Galicia encabeza as cifras do Estado

Yolanda Díaz: “Se asumimos que a precariedade laboral mata, temos que dedicar recursos a frear unha lacra que non cae do ceo, senón que ten responsables”. 

Eva Solla: “É hora de que o Goberno do PP se tome en serio a seguridade da clase traballadora, repoña os recortes en materia de seguridade no emprego e leve a cabo as inspeccións necesarias para paliar isto”.

Esquerda Unida vén denunciando que, lonxe de establecer plans de accións e destinar diñeiro para paliar a sinistralidade laboral, o goberno galego descoida esta temática sen asumir que a precariedade laboral mata. Onte morreu unha traballadora da planta de tratamento de residuos da Sociedade Galega do Medio Ambiente (Sogama), dependente da Xunta, ao quedar atrapada nunha máquina.

Segundo explica Yolanda Díaz, coordinadora de Esquerda Unida e deputada de En Marea, “os recortes que vén facendo o PP nas partidas orzamentarias revelan a súa posición clara ante a sinistralidade laboral: bonificar ao empresario e restar recursos ás actuacións de prevención de riscos laborais, todo isto nun marco de supresión de dereitos laborais. Parece que non queren entender que a precariedade mata e que a vida non se pode perder nun posto de traballo, tal e como ocorreu onte; é intolerable”.

A coordinadora de Esquerda Unida destaca que as cifras en Galicia falan por si soas: “Segundo o Instituto Galego de Seguridade e Saúde Laboral (ISSGA), a altura do último informe, Galicia foi a primeira comunidade con un índice máis alto de sinistralidade laboral. Entre decembro de 2015 e novembro de 2016 morreron 55 persoas, 24.033 sufriron un accidente leve e 483 un accidente grave, é dicir, na nosa Comunidade sufrimos máis dun accidente grave por día de ano, o que nos está a sumir nunha situación dramática”.

As persoas traballadoras están a soportar o desemprego, os baixos salarios e os recortes salariais, ademais dunha sinistralidade laboral que ten que frear. Para Díaz, o método é “acultura de prevención laboral”. “Se asumimos que a precariedade laboral mata, temos que dedicar recursos a frear unha lacra que non cae do ceo, senón que ten responsables”, denuncia.

Galicia: Un 96% menos nas partidas de prevención de riscos

Tal e como Eva Solla, membro da dirección de Esquerda Unida e deputada de En Marea, xa denunciara en rolda de prensa, á hora de facer unha valoración dos Orzamentos Autonómicos da Xunta de Galicia para o 2017, as partidas de seguridade no traballo recortaban ata un 96% na partida de prevención de riscos laborais. “Levamos un acumulado de recorte dende 2009 do máis do 96% nas partidas que teñen que ver coa mellora de saúde e seguridade no traballo, uns 20 millóns de euros en termos reais”, lembra.

Segundo Solla, “é hora de que o Goberno do PP se tome en serio a seguridade da clase traballadora, repoña os recortes en materia de seguridade no emprego e leve a cabo as inspeccións necesarias para paliar isto. Doutra banda, o goberno central ten que derrogar as reformas laborais, xa que a sinistralidade está relacionada coa precariedade e os contratos lixo”, remata a deputada.