Esquerda Unida esixe á Xunta explicacións pola propaganda institucional no reparto de máscaras nas farmacias

Publicado por o día 11/05/2020 na sección de Esquerda Unida,Política

Esquerda Unida esixe á Xunta explicacións pola propaganda institucional no reparto de máscaras nas farmacias

O pasado 24 de Abril o Consello da Xunta anunciou o reparto de máscaras protectoras nas farmacias a pensionistas con rendas inferiores a 18.000 euros, persoas en situación de risco de exclusión e persoas sen emprego.

Esquerda Unida entende que a decisión de facilitar este medio para evitar a transmisión do coronavirus é unha decisión positiva, sen embargo, denuncia que o feito de repartilo cun logotipo da Xunta de Galicia ben visible constitúe un acto claro de propaganda da institución autonómica a posiblemente só uns meses do proceso electoral.

Hai que lembrar que só dous meses atrás, antes de que fosen suspendidas as eleccións autonómicas, a Xunta Electoral xa reprendera á Xunta de Galicia por unha campaña publicitaria na que o lema era idéntico ao lema electoral de Alberto Núñez Feijóo, polo que a Xunta Electoral ordenara a súa retirada.

Non se trata pois da primeira vez que cun proceso electoral próximo se realiza un uso cuestionable da propaganda institucional, neste caso ademais cun elemento sensible como o é os medios contra o coronavirus e ademais dirixidos a colectivos vulnerables.

Esquerda Unida esixe que a Xunta de Galicia dea explicacións por esta propaganda, totalmente innecesaria e pide que os recursos económicos se concentren na adquisición das máscaras e materiais necesarios para loitar contra o coronavirus.

Comentar noticia

Your email address will not be published.