“Estase a resolver un problema urbanístico histórico desta cidade”

O Concello vén de conceder licencia de primeira ocupación ao edificio da Avenida de Samil 55, logo de que a propiedade fixera obras de adaptación e cumpra cos requisitos da normativa de apartamentos turísticos. O outro edificio da Avenida en situación similar, explicou Abel Caballero, tramita o seu permiso urbanístico pola mesma vía.
Publicado por o día 14/09/2018 na sección de Concello de Vigo,Galicia,Vigo

“Estase a resolver un problema urbanístico histórico desta cidade”

A licencia concedida á Xestora Apartamentos Samil 55 contempla un total de 48 apartamentos turísticos no edificio da Avenida de Samil 55, unha autorización que “pon fin a unha longa traxectoria para facer cumprir as leis”, anotou o alcalde en rolda de prensa, cifrada en case que tres décadas.

Caballero explicou que é posible conceder a licencia porque a propiedade realizou as obras de adaptación do edificio que lle esixiu o Concello e agora adáptase á recente normativa de apartamentos turísticos. Ademais, os titulares urbanizaron a rúa colindante ao inmoble.

Na Avenida de Samil existe un segundo edificio de apartamentos que presenta a mesma problemática urbanística que o sito no número 55. Neste caso, avanzou Caballero, a propiedade está a tramitar a súa licencia de primeira ocupación pola mesma vía, en base á norma dos apartamentos turísticos.

“Con isto garántese o cumprimento da legalidade urbanística e das leis nos apartamentos da Avenida de Samil 55, a outra licenza está en tramitación, e se está a resolver un problema urbanístico histórico desta cidade”, concluíu Caballero.