Ethel Vázquez anuncia a licitación dos estudos para a 2ª fase do Plan de transporte, cun investimento de 2,7 millóns de euros destinado a que Galicia teña en 2020 un servizo moderno e acorde ás necesidades reais

Vázquez Mourelle avanza que en abril se abrirá a participación pública para que as Administracións, colectivos ou particulares fagan achegas ao Plan, continuando da man do sector e das forzas sindicais a través da Comisión de Seguimento
Por o 16/02/2018 | Sección: Xunta de Galicia
Ethel Vázquez anuncia a licitación dos estudos para a 2ª fase do Plan de transporte, cun investimento de 2,7 millóns de euros destinado a que Galicia teña en 2020 un servizo moderno e acorde ás necesidades reais

A conselleira de Infraestruturas, Ethel Vázquez, xunto co director xeral de Mobilidade, Ignacio Maestro, anunciou nunha rolda de prensa a licitación hoxe dos estudos para a 2ª fase do Plan de Transporte, cun investimento de 2,7 millóns de euros destinado a que Galicia teña en 2020 un servizo moderno e acorde ás necesidades reais.

Vázquez Mourelle explicou que a Xunta, con esta licitación dos estudos dá a saída da 2ª fase do Plan de Transporte. Concretou que a próxima semana se dará outro paso, cumprindo a normativa vixente, anunciando a Europa con 12 meses de antelación que en 2019 se sacarán a licitación as novas concesións de transporte para os vindeiros dez anos.

Posteriormente, en abril se abrirá un proceso de participación pública para que calquera Administración, colectivo, ou particular poida facer as achegas ao Plan. Este traballo se realizará da man do sector e das forzas sindicais a través da Comisión de Seguimento do Plan, que será un foro de debate clave.

A responsable de Infraestruturas indicou que no 2º semestre do ano se efectuará o traballo de campo e a definición de liñas e elaboración dos proxectos de explotación das concesións, de xeito que no 1º trimestre de 2019 se poidan someter a información pública. Precisou que este proceso ten como obxectivo que en verán de 2019 se poidan aprobar os proxectos e iniciar a contratación para que a finais dese ano poidan poñerse en marca os servizos.

Resposta ás necesidades reais

O Goberno galego, para avanzar cara a 2ª fase do plan, levará a cabo un fondo estudo da situación e das necesidades actuais e futuras mediante un traballo de campo rigorosamente planificado. Analizaranse con detalle os servizos que se prestan na actualidade, mantendo encontros cos responsables municipais e facendo enquisas nos centros de demanda para coordinar os horarios dos autobuses cos dos servizos que prestan neles.

Por exemplo, nos centros sanitarios, se identificarán días e horas de analíticas ou consultas para garantir que o máximo número de persoas usen o transporte público para chegar a elas. No caso dos centros educativos, a información sobre a mobilidade dos estudantes de infantil, primaria e ESO está perfectamente identificada na Consellería de Educación, polo que a Xunta se centrará nos centros de Bacharelato e de FP para dar solucións que garantan que os estudantes que o precisen poidan chegar ás aulas nos horarios adecuados.

No marco destes estudos, seguiranse de preto as paradas e ás estacións así como aos autobuses en ruta para falar cos usuarios actuais e que dean as súas impresións sobre o servizo. Tamén se recollerán opinións nos principais centros administrativos e de servizos como a Xunta, instalacións municipais, centros penais, BRILAT, cuxas necesidades acutais e futuras tamén serán tidas en conta.

Vázquez Mourelle indicou que con esta información comezará a formulación de alternativas baixo o criterio de rede xerarquizada: con liñas de longo percorrido, que unirán as 7 grandes cidades; intercomarcais; comarcais, conectando as vilas secundarias coa capitalidade comarcal; e rurais, que rematarán a vertebración entre núcleos de menor entidade.

En todos os casos, terase en conta a posibilidade de seguir establecendo servizos a demanda naqueles casos nos que se xustifique e o transporte compartido, definindo sempre as liñas de xeito que garantan o servizo aos centros educativos e a seguridade, mantendo a figura do monitor acompañante, tal e como está funcionando a día de hoxe.

Incremento de viaxeiros e servizos

No que se refire á 1ª fase do Plan de Transporte, a conselleira sinalou que nestes meses de funcionamento se ten rexistrado un incremento dun 4% no número de viaxeiros do transporte público de uso xeral.

O pasado 8 de agosto, dando continuidade aos contratos renunciados, 800 novas liñas puxéronse a conectar aos galegos. Tras 6 meses de funcionamento, o balance é positivo, xa que se incrementaron o número de km percorridos polos autobuses un 36% e triplicouse o número de paradas, o que significou unha mellor cobertura en moitas partes de Galicia.

O plan tamén posibilitou a rebaixa das tarifas, con baixadas de prezo en practicamente tódalas novas liñas e das que hai exemplos de ata o 80% de redución.

Esta iniciativa contemplou a implantación de novos modelos de transporte como os servizos a demanda, autobuses que só circulan no caso de que algún usuario o solicite na central de reservas, que recibiu preto de 500 chamadas nestes meses, especialmente durante o Nadal, por ser en período non lectivo no que se incrementan este tipo de servizos.

Outra nova modalidade tamén foi o sistema de transporte compartido, no que o mesmo autobús que leva aos rapaces á escola sempre cun monitor acompañante e, as prazas que queden baleiras poden aproveitalas o público en xeral. Este modelo supón un uso eficiente dos recursos públicos, posto que incrementa a oferta aos usuarios, ao tempo que elimina autobuses baleiros das nosas estradas.

Nas 491 liñas integradas, xa foron máis de 40.000 persoas as que aproveitaron estes autobuses escolares para facer os seus desprazamentos, un sistema eficiente que ademais incide na calidade de vida do rural de Galicia, posto que é aí onde este sistema funciona. Por este motivo, este modelo que xa está funcionando en gran parte dos concellos de Galicia, en Asturias, Castela e León, País Vasco e Navarra, está en fase de implantación tamén en Estremadura, Castela A Mancha e Aragón.