Falece un condutor tras incendiarse o seu vehículo en Muíños

Publicado por o día 21/05/2018 na sección de Sucesos

Falece un condutor tras incendiarse o seu vehículo en Muíños

Unha persoa faleceu calcinada no interior do seu turismo tras incendiarse na localidade ourensá de Muíños.

Ao fío das 20:30 horas deste domingo, unha persoa particular alertaba ao 112 Galicia dun coche ardendo en Albite, en Prado de Limia.

Decontado, dende o CIAE pasouse aviso aos membros do GES e de Protección Civil de Muíños. Tamén foron alertados os axentes da Garda Civil e os servizos sanitarios.

Nada mais chegar ao punto indicado, os servizos de emerxencias confirmaron a existencia dunha persoa calcinada no interior do turismo. O coche ardeu na súa totalidade.

Excarcerada unha persoa despois de envorcar co seu vehículo en San Sadurniño

Os Bombeiros do Eume excarceraron esta mañá a unha persoa do interior do vehículo que conducía ao seu paso pola localidade coruñesa de San Sadurniño.

O accidente ocorreu sobre as 07:15 horas desta mañá, á altura da saída 17 da Autovía de Ferrol- As Pontes. Foi un particular quen, a esa hora, alertou ao 112 Galicia dun coche envorcado na AG-64, dirección Ferrol. Indicaba que non vira saír ao condutor do interior do turismo, polo que pensaba que podía estar atrapado.

Así, alertouse ao 061-Urxencias Sanitarias e aos Bombeiros do Eume que decontado se desprazaron ao punto indicado. Do mesmo xeito, dende o CIAE requiriuse a intervención dos axentes de Tráfico.

Tras chegar ao punto, os Bombeiros confirmaron a excarceración dunha persoa e única ocupante do vehículo e o traslado en ambulancia ao centro hospitalario de referencia.

Accidente tractor

Por outra banda, a escasos minutos das 21:00 horas, o 112 Galicia era informado dun accidente de tractor no concello lucense de Cervantes, concretamente no lugar de Vilaspasantes.

Os feitos ocorrían nun domicilio particular e foi a dona do condutor da máquina agrícola quen alertou ao 112 Galicia.  Indicaba que sentía ao seu home pedir axuda.  De inmediato, dende o Centro Integrado de Atención ás Emerxencias (CIAE) 112 Galicia púxose en alerta ao persoal sanitario do 061, GES de Becerreá e Bombeiros de Sarria. Tamén, solicitouse a colaboración dos axentes da Garda Civil e dos efectivos de Protección Civil da localidade, que confirmaron que ao envorcar, o vehículo  atropelou ao ferido. Aínda así, non foi preciso o emprego do material de excarceración.

O home foi trasladado en ambulancia polo persoal sanitario.