Feijóo anuncia a ampliación da Tarxeta Básica por tres meses máis, para axudar á adquisición de produtos básicos ás familias vulnerables que o precisen

O presidente do Goberno galego, Alberto Núñez Feijóo, anunciou hoxe que a Tarxeta Básica, que achega entre 450 e 900 euros trimestrais –dependendo do número de persoas que conforman a unidade familiar— a familias vulnerables, ampliará a súa vixencia por tres meses máis. “Ampliamos de 3 a 6 meses esta tarxeta extraordinaria para garantir que as persoas con dificultades poidan adquirir produtos de alimentación, hixiene e farmacia”, aseverou.

Durante unha visita ás instalacións da entidade Ecos do Sur na Coruña, Feijóo explicou que, grazas a esta prórroga, as persoas que recibiron estes apoios nos meses de xullo, agosto e setembro poderán volver solicitalo para recibilo durante 3 meses máis, isto é, ata finais de ano. E os novos solicitantes terán a oportunidade tamén de acceder á Tarxeta sabendo que pode ser un apoio extra para as súas necesidades durante medio ano.

O titular do Goberno galego salientou a simplicidade do proceso para acceder á Tarxeta Básica, xa que o solicitante pode facelo a través da Cruz Vermella ou dos servizos sociais do seu concello e recibiraa nun prazo máximo de 72 horas. “Estamos a falar pois dunha axuda urxente e case inmediata, que alivia e facilita o traballo dos servizos sociais dos concellos e que non estigmatiza, ao ser unha tarxeta anónima”, dixo, subliñando que desde a súa aprobación en xullo xa se beneficiaron dela 7.000 familias.

Nesta mesma liña, Feijóo lembrou que o Goberno galego traballou para apoiar a aquelas persoas cuxas dificultades se incrementaron debido á covid. Nun primeiro momento a través do Plan de continxencia, para parar o primeiro impacto da crise e, posteriormente, co Plan de recuperación social, con máis de 60 millóns de euros para mitigar a situación dos fogares vulnerables.

Incremento do apoio ás entidades sociais

Durante a súa visita a Ecos do Sur, o presidente do Goberno galego garantiu o compromiso da Xunta coas entidades sociais, referíndose como exemplo á orde de axudas aprobada a semana pasada para entidades de inclusión social e que supera os 17 millóns de euros, un incremento do 12% respecto da convocatoria anterior.

Feijóo resaltou e agradeceu o labor “imprescindible” de Ecos do Sur, unha entidade que leva 30 anos traballando pola integración das persoas migrantes e das que pasan apuros económicos. E constatou o respaldo ao seu traballo, cunha achega de máis de 550.000 euros dentro da orde de axudas aprobada.

Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.

SIGUENOS EN TELEGRAM

Comentarios (0)
Publicar comentario