Feijóo avanza a posta en marcha do Plan estratéxico de xuventude 2019-2021, dotado con 410 millóns, para xerar máis e mellores oportunidades en ámbitos como o emprego, a formación ou o rural

Resalta que se trata 125 medidas co obxectivo claro de mellorar as capacidades e habilidades da mocidade no presente e aumentar as súas oportunidades no futuro
Publicado por o día 14/06/2019 na sección de Xunta de Galicia

Feijóo avanza a posta en marcha do Plan estratéxico de xuventude 2019-2021, dotado con 410 millóns, para xerar máis e mellores oportunidades en ámbitos como o emprego, a formación ou o rural

O presidente do Goberno galego, Alberto Núñez Feijóo, avanzou onte, na rolda de prensa do Consello, a posta en marcha do Plan estratéxico de xuventude 2019-2021, dotado con 410 millóns de euros, para xerar máis e mellores oportunidades en ámbitos como o emprego, a formación ou o rural.

“Estamos a falar de 125 medidas para actuar en seis ámbitos prioritarios co obxectivo claro de mellorar as capacidades e habilidades da mocidade no presente e para que a xente nova poida ter máis oportunidades no futuro”, dixo, subliñando que estas actuacións estarán distribuídas en 12 eixes, entre os que destacou o emprego, coa creación de novas axudas para obter o permiso de condución B ou C e o reforzo de programas como Emprural, para facilitar a inserción laboral da mocidade na economía rural.

Así mesmo, impulsarase a iniciativa Talento Mozo, con dous alicerces principais: obradoiros e charlas protagonizados por galegos novos que destaquen nalgunha área, para que sirvan de referentes e exemplo para outras persoas novas; e, en segundo lugar, crearanse os Premios Talento Mozo, para distinguir e recoñecer carreiras de éxito da mocidade galega en diferentes ámbitos.

Outras medidas que se porán en marcha están centradas no acceso á vivenda, cunha oficina de emancipación xuvenil virtual para informar sobre as opcións que existen en materia de vivenda e emprego ou a saúde e deporte, con accións orientadas a crear unha cultura da vida saudable desde as idades máis temperás.

No ámbito da participación e asociacionismo, cómpre salientar a extensión progresiva das actividades de lecer e tempo libre ao longo de todo o ano, para evitar que queden restrinxidas aos meses de verán. “E, por outra banda, poremos en marcha o programa Foro Xove, encontros periódicos entre os responsables públicos e persoas mozas para favorecer a interactuación entre ambos colectivos; así como a creación dunha liña especial do programa Iniciativa Xove —que financia con ata 5.000 euros a posta en marcha de ideas innovadoras— centrada na promoción e dinamización do Camiño de Santiago e o Xacobeo 2021”, engadiu.

Así mesmo, o presidente da Xunta destacou o impulso do voluntariado, centrado no Camiño de Santiago; a mobilidade, coa xa anunciada ampliación da Tarxeta Xente Nova para todos os autobuses interurbanos; ademais do compromiso de seguir impulsando medidas encamiñadas a potenciar o uso do galego entre a mocidade, a igualdade e o medio ambiente.

O texto continuará a súa tramitación co traslado ao Comité Galego de Políticas de Xuventude para garantir a plena coordinación de todas as administracións públicas.

Comentar noticia

Your email address will not be published.