Feijóo avoga por unha ordenación do territorio responsable que conxugue a protección da contorna co crecemento económico

“Cando estes elementos interactúan non suman o seu potencial, senón que o multiplican”, afirma
Publicado por o día 31/10/2017 na sección de Medio Ambiente,Xunta de Galicia

Feijóo avoga por unha ordenación do territorio responsable que conxugue a protección da contorna co crecemento económico

O presidente da Xunta, Alberto Núñez Feijóo, avogou onte por unha ordenación do territorio responsable que conxugue a protección da contorna co crecemento económico. “Cando estes elementos interactúan non suman o seu potencial, senón que o multiplican”, aseverou, lembrando que con este obxectivo, Galicia conta cunhas Directrices de Ordenación do Territorio, cunha nova Lei do solo, e, por primeira vez, cun regulamento unificado para aplicala.

Así mesmo, subliñou que a Comunidade contará con máis instrumentos normativos para impulsar o desenvolvemento sustentable, referíndose ademais á presentación no primeiro semestre de 2018 do Plan básico autonómico, que servirá como punto de apoio para que os concellos pequenos poidan dispoñer dun planeamento urbanístico; á nova Lei de ordenación do territorio; e á nova Guía de cores e materiais presentada a semana pasada, para que as construcións novas ou rehabilitadas se integren mellor na paisaxe.

Durante o acto de presentación da Fundación RIA-Rede de Innovación Arousa, Feijóo valorou as ideas e propostas desta fundación sobre a situación actual e o futuro deste enclave. Neste sentido, incidiu en que a riqueza natural, lonxe de ser un obstáculo para progresar, é un alicerce esencial do desenvolvemento sustentable, poñendo de relevo a necesidade do traballo conxunto entre administracións de cara ao mantemento da calidade da auga e a protección da biodiversidade.

O responsable do Goberno galego aseverou que o respecto á contorna natural é tamén o piar sobre o que se ten que asentar o desenvolvemento turístico; un turismo, dixo, que non comprometa nin erosione o modo de vida, senón que o poña en valor.

En relación ás áreas portuarias, expuxo a importancia de que estas non se desenvolvan de costas ás vilas, senón que se integren nelas, funcionando como núcleos da actividade social e económica. Ao respecto, afirmou que a Xunta seguirá traballando para transformar as barreiras físicas e administrativas entre os portos e as vilas en límites permeables e de intercambio.

Ao longo da súa intervención, recordou o compromiso da Xunta en materia de rehabilitación, coa tramitación da Lei galega de rehabilitación, que busca facer do patrimonio arquitectónico un elemento máis de dinamización económica. “E a partir do ano que vén, as persoas que invistan en rehabilitación ou en actividades económicas nos cascos históricos terán deducións fiscais”, abundou.

Por último, e co obxectivo de que as estradas unan e non separen, Feijóo incidiu no reto que supón o redeseño da rede viaria. Sobre este punto, e a modo de exemplo, salientou que a apertura da Autovía do Barbanza descargou do tráfico de media distancia moitas estradas da zona.