Fernández: “Este colectivo da o paso para sumar nestas eleccións”

Ana Pontón salienta a aposta do BNG “por sumar ao cambio galego sen submisións nin dependencias a Madrid”
Publicado por o día 03/03/2020 na sección de BNG,Galicia,Política,Vigo

Fernández: “Este colectivo da o paso para sumar nestas eleccións”

A portavoz nacional, Ana Pontón, e a número tres pola candidatura de Pontevedra, Alexandra Fernández, compareceron ante os medios para dar conta do proceso de incorporación ás listas do BNG tras un proceso de reflexión que a propia Fernández salientou que ía máis aló do persoal, porque obedece a un proceso de reflexión colectivo que inclúe a moitas persoas que até agora participaban do espazo político de Anova e das Mareas en diferentes lugares do país.

A líder nacionalista destacou que, tras un proceso de renovación e actualización sen renunciar á experiencia, o BNG é hoxe unha alternativa que “ilusiona” e que cada vez máis galegos e galegas como garantía dun cambio real, o que se traduce na capacidade do Bloque para sumar en clave de país.

“Para construír a Galiza que queremos é fundamental sumar, sumar para avanzar en clave de país sen submisións nin dependencias a Madrid, sumar para acrecentar a ilusión entorno ao cambio galego, ao cambio posible e sumar a aquelas persoas que desde traxectorias diferentes nos unimos nun proxecto de país”, explicou Pontón. “Esta suma fai que o cambio galego estea máis cerca e poder contar cun muller nacionalista na Presidencia”.

A incorporación ás candidaturas da que fora deputada da Marea no Congreso responde a esa vontade de sumar, -explicou-, “unha incorporación que parte dunha reflexión persoal pero tamén colectiva na que se fai unha aposta para fortalecer a alternativa que pode cambiar as cousas nun momento decisivo para o país, a alternativa do BNG”.

Neste sentido, Pontón agradeceu o paso dado por Fernández, de quen destacou “a coherencia na defensa de Galiza, sen someterse aos ditados de Madrid, e agora quere contribuír a que toda unha xeración de galegos e galegas podamos mirar o futuro con esperanza. Desde o BNG agradecemos o seu paso adiante para implicarse no cambio galego nun momento no que hai unha gran onda de ilusión arredor das candidaturas do BNG”.

A candidata á Presidencia defendeu a necesidade de “ter resposta propias” ante retos como a globalización, o cambio climático e para construír un país con oportunidade e máis xusto. “Cada vez hai máis xente ilusionada con Bloque e volvemos estar ante a oportunidade histórica de que o nacionalismo teña un papel preponderante para abrir un horizonte de esperanza”, recalcou.

Propostas, ideas, ilusión

Pontón avanzou que o BNG vai levar a cabo “unha campaña de debate de ideas, de propostas e de ilusión, porque de nada vale a crítica sen alternativas, basta de submisión a Madrid con gobernos que no creen no potencial do país. É hora dun cambio galego cunha muller coas mans libres liderando un goberno que deixe atrás a desfeita de Feixóo”.

Pola súa parte, Alexandra Fernández explicou o motivo que lle le levou a dar o paso de sumarse ao BNG, tanto a nivel individual como a un colectivo de persoas que no seu momento participaron dentro do espazo de Marea ou de Anova: “a conclusión é que o modelo de entendemento coa esquerda estatal está esgotado”.

“Con ese rumbo claro queríamos sumar, dar un paso adiante e facelo co BNG porque somos conscientes de que o Bloque é a única organización que ten un proxecto alternativo para este país”, recalcou, en relación a súa incorporación e tamén ao apoio dun colectivo de persoas que viñan desenvolvendo o seu traballo político no espazo das Mareas e de Anova en Bueu, Cangas, Vigo, Rianxo, Santiago ou Ferrol.

Vontade integradora

Como explicaba Fernández, “este colectivo da o paso para sumar nestas eleccións e tamén o facemos pensando a longo prazo, creemos que esta aposta abre un horizonte de traballo e servir de referente para moita xente que agora fai a mesma reflexión de que hai que fortalecer o espazo de soberanismo e que iso ten que ir na vía de afondar na suma co BNG”.

A candidata número tres por Pontevedra destacou a “xenerosidade do BNG, pola súa vontade integradora que fai máis forte esta candidatura, e cun modelo alternativo para este país que só o BNG é capaz de poñer en marcha”. Igualmente destacou o papel da candidata nacionalista: “unha muller coas ideas claras e con vontade de diálogo, que encarna moi ben esa nova xeración que quere cambiar o rumbo deste país para poñelo ao servizo das maiorías sociais. Aporto o meu grao de area para sexa a primeira presidenta da Xunta”, concluíu.

 

Comentar noticia

Your email address will not be published.