Finaliza o proxecto TurGaSur: seguimento e mellora do coñecemento da Unidade de Xestión Tursiops truncatus Galicia Sur en áreas Rede Natura 2000

Realizadas 20 mostraxes de fotoidentificación en 5 áreas mariñas Rede Natura 2000 da Ría de Vigo, rexistrados 52 avistamentos de arroaces, e recollidas 27.776 fotografías que pasan a formar parte do catálogo de fotoidentificación dos arroaces de Galicia.
Publicado por o día 24/09/2019 na sección de CEMMA,Social

Finaliza o proxecto TurGaSur: seguimento e mellora do coñecemento da Unidade de Xestión Tursiops truncatus Galicia Sur en áreas Rede Natura 2000

O pasado mes de decembro, a Coordinadora para o Estudio dos Mamíferos Mariños-CEMMA puxo en marcha o proxecto “TurGaSur: seguimento e mellora do coñecemento da Unidade de Xestión Tursiops truncatus Galicia Sur en áreas Rede Natura 2000″, contando co apoio da Fundación Biodiversidad do Ministerio para la Transición Ecológica, a través da Convocatoria 2018 de concesión de axudas da Fundación Biodiversidad, en réxime de concorrencia competitiva, para a realización de actividades no ámbito da biodiversidade terrestre, biodiversidade mariña e litoral, e o fomento da información ambiental.

TurGaSur está adherido ao LIFE IP INTEMARES, o maior proxecto de conservación mariña que se está a desenvolver nestes momentos en Europa.

O obxectivo xeral do proxecto TurGaSur é contribuír á conservación dos arroaces (Tursiops truncatus) a través das áreas mariñas Rede Natura 2000 e da participación social.

Como obxectivos específicos de TurGaSur podemos sinalar os seguintes:

– Mellorar o coñecemento sobre a estrutura social e o uso do hábitat da Unidade de Xestión Tursiops truncatus-Galicia Sur.

– Avaliar e promover as áreas mariñas Rede Natura 2000 como elementos de importancia para a conservación da Unidade de Xestión Tursiops truncatus-Galicia Sur.

– Potenciar a participación social como ferramenta fundamental para a conservación das áreas protexidas e das especies ameazadas, mediante a participación en mostraxes científicos.

Para levar a cabo este proxecto e poder realizar os traballos de monitorización de cetáceos, a CEMMA conta con autorizacións administrativas expedidas por la Subdirección General para la Protección del Mar-Ministerio para la Transición Ecológica, e pola Dirección Xeral de Patrimonio Natural-Xunta de Galicia, xa que os arroaces son unha especie protexida.

MOSTRAXES FOTOIDENTIFICACIÓN

Unha das principais accións establecidas dentro do proxecto foi a realización de 20 mostraxes nas áreas Rede Natura 2000 da Ría de Vigo e augas próximas.

Estas mostraxes realzáronse seguindo a metodoloxía de transecto lineal e fotoidentificación, e consistiron en percorrer as zonas de estudo para tratar de localizar as manadas de arroaces e realizar fotografías das súas aletas dorsais. Deste xeito, se pode chegar a identificar individualmente a cada exemplar, mediante as marcas (escotaduras, cicatrices e feridas) propias e características que presentan na súa aleta dorsal.

As 5 áreas Rede Natura 2000 da Ría de Vigo e augas próximas nas que se realizaron as mostraxes foron: ZEC Enseada de San Simón, ZEC Costa da Vela, ZEC Illas Cíes, ZEC Illas Estelas e ZEPA Espazo mariño Rías Baixas.

Durante estas 20 mostraxes, se realizaron un total de 116,3 h de observación ao longo de 1089,5 km de transecto de mostraxe. Se rexistraron un total de 52 avistamentos de arroaces (Tursiops truncatus), realizándose rexistros da presenza da especie en todas as mostraxes. A duración total destes avistamentos foi de 28,2 h. Durante este período de monitorización dos cetáceos, se realizaron un total de 27.776 fotografías.

Nestas mostraxes cabe destacar especialmente a participación dun total de 38 persoas voluntarias, que recibiron formación técnica específica para participar nelas, e que pertencen ao equipo de voluntariado do proxecto, formado por 115 persoas. O voluntariado que participou nas mostraxes recibiu unha camiseta e un certificado de participación no proxecto, e non se limitou simplemente a acompañar ao equipo técnico da CEMMA, senón que tivo unha actuación e participación moi activas a bordo, grazas aos coñecementos adquiridos nas xornadas de formación técnica específica ás que asistiron.

CATÁLOGO DAS ALETAS

Nestes momentos, a CEMMA está a revisar e analizar os excelentes resultados obtidos nesta importante campaña específica que tiña como obxectivo profundizar no coñecemento do uso do hábital e da estructura social dos arroaces, unha especie de cetáceo que vive moi preto de nós, pero dal cal aínda son descoñecidos moitos aspectos da súa bioloxía.

Está previsto que, a principios de outubro estea listo o Catálogo TurGaSur de fotoidentificación dos arroaces de Galicia Sur-Manual de boas prácticas de navegación, que constituirá unha ferramenta de grande importancia dentro da conservación da especie.

No catálogo se darán a coñecer as aletas dos 150 arroaces que contan cunha maior presenza nas augas da Rías Baixas. Grazas ás imaxes das súas aletas, será posible identificalos e recoñecelos, un a un, de xeito individual.

Manda de arroaces fotografiada na área Rede Natura 2000 ZEC Illas Estelas, durante unha das mostraxes TurGaSur.
Mediante as marcas que presentan nas aletas dorsais, é posible identificar aos exemplares de xeito individual. Neste caso trátase de DIGIMÓN, á esquerda, e de TECO, á dereita.
Dúas voluntarias do proxecto TurGaSur, realizando fotografías dos arroaces nas proximidades das Illas Cíes.
Seguimento fotográfico dunha manda de arroaces na Ría de Vigo durante unha das mostraxes TurGaSur.
Femia adulta acompañada pola súa cría. O traballo de fotoidentificación permite recoller información sobre o ciclo reproductor dos exemplares.
Grupo de tres exemplares fotografiados nas proximidades de Cabo Estai.