Financiamento autonómico, infraestruturas ferroviarias e transferencia da AP9 son as prioridades que En Marea marca ao novo goberno do Estado para Galicia

O voceiro de En Marea, Luís Villares, saudou a presenza feminina no equipo de goberno de Pedro Sánchez pero reclamou que non quede nun xesto senón que se concrete nun impulso de políticas públicas de igualdade de carácter transversal.
Publicado por o día 08/06/2018 na sección de En Marea,Política

Financiamento autonómico, infraestruturas ferroviarias e transferencia da AP9 son as prioridades que En Marea marca ao novo goberno do Estado para Galicia

O voceiro de En Marea, Luís Villares, e o voceiro no Congreso, Miguel Anxo Fernán Vello, fixeron unha primeira valoración do novo goberno do Estado do presidente Pedro Sánchez salientando a necesidade de non esquecer o compromiso que lle propiciaron o cambio de goberno.

Nesta liña, sinalaron varias cuestións fundamentais como é acabar co amordazamento dos dereitos civís, a loita contra a corrupción e traballo pola rexeneración, a recuperación de dereitos sociais brutalmente recortados estes anos e, finalmente, acabar coa recentralización e a negación do Estado plurinacional. “O fundamental do novo goberno non é o seu pasado senón o seu futuro” afirmou.

Con esta apreciación e destacando que o que interesa realmente a En Marea “son as políticas que impulsarán”, polo que Villares saudou positivamente a presencia maioritaria de mulleres nos distintos ministerios, “un xesto que ten que ser un compromiso real coa igualdade” e impulsar políticas públicas de igualdade de carácter transversal, un compromiso que o goberno do PP non tivo.

“Albiscamos no perfil económico elixido máis preocupación pola ortodoxia marcada pola UE que en lanzar políticas económicas que apoie ás políticas sociais, europeísmo social baseado nos dereitos e na Europa dos pobos” advertiu Villares.

No referente ao peso político de Galicia no novo goberno do Estado, o voceiro de En Marea lembrou que a simple presenza de persoas galegas non é garante da defensa dos intereses do noso pais pero apreciou que si existe “máis peso do arco Mediterráneo que Atlántico que esperamos non prexudique a o noso país”.

Por último, Villares fixo referencia ao tratamento de Galicia como nación por parte do goberno de Pedro Sánchez o que se ten que traducir na recuperación de competencias que foron usurpadas polo Goberno do PP e o avance competencial. Nesta liña marcou como horizonte temporal finais deste ano para demostrar que é un goberno de compromisos e non so de xestos. Para isto, o voceiro de En Marea marcou tres tarefas inescusables.

  1. Financiamento económico: que permita desenvolver políticas propias para reverter a situación de implosión demográfica e acabar coa migración da mocidade.
  2. Infraestruturas ferroviarias: ademais de reclamar execución do corredor atlántico ferroviario xa presentado desde onte, “algo que non tería sido posible se En Marea non tivera arrastrado ao PP a incluílo”, e agora o que se esixe é avanzar para materializar este compromiso. Pero tamén que se comece a falar do arco Atlántico plenamente potenciado coa saída de sur Vigo e que forme parte dos vindeiros orzamentos, igual que a liña Coruña-Ferrol, e as conexións dos portos. Pero tamén a cohesión territorial completa coa potenciación do antigo FEVE entre Ferrol e Ribadeo, e vertebración interior de A Coruña-Lugo Ourense, e Ourense-Compostela coa regularización e actualización e modernización das liñas sexa unha realidade.
  3. Transferencia da AP9: cuestión prioritaria para cumprir cos intereses do noso país.

Estes serán os compromisos concretos que En Marea que demandará do novo goberno do Estado a maiores doutra serie de medidas como pode ser a derrogación da Lei Montoro que esmaga capacidade dos concellos para facer política social ou a recuperación para o público da fachada litoral da Coruña entre outros.

CONGRESO

O voceiro de En Marea no Congreso, Miguel Anxo Fernán Vello, en declaracións previas á Xunta de Voceiros, saudou ao novo Goberno de Pedro Sánchez destacando que “cómpre celebrar a numerosa presenza de mulleres, cunha amplia maioría”, non obstante, “é necesario destacar algúns claroscuros como o nomeamento de Grande-Marlaska”.

Co novo Goberno ábrese un novo tempo para deixar atrás a corrupción e a ineficacia do Partido Popular. Neste novo tempo, como afirmou Fernán Vello “hai que revertir as políticas antisociais, rematar cos recortes, ser eficaces contra a violencia machista, erradicar a precariedade e a pobreza, retomar o diálogo con Catalunya e defender a liberdade de expresión”.

No tocante a Galicia, o voceiro no Congreso lembrou que “non se pode esquecer o desleixo do Goberno do Partido Popular a Galiza rebaixando o estatus de nacionalidade histórica. As nefatas políticas de Rajoy e Feijóo deben de ser revertidas para recoñecer o carácter nacional galego”.

“Estaremos moi atentos ás políticas reais do Goberno para defender Galicia”, destacou Miguel Anxo Fernán Vello. Como indicou o voceiro, o grupo de En Marea no Congreso traballará para esixir a transferencia da AP-9, abordar a prórroga de ENCE, a financiación autonómica e revertir o atraso en materia ferroviaria.