Font celebra que a ampliación do Ifevi permita a Conxemar aumentar a súa capacidade nun 20%

Carlos López Font participou esta onte a mañá no Ifevi na inauguración do VII Congreso Internacional sobre Produción Pesqueira Mundial que conta coa presenza de máis de 400 expertos. Esta cita é a antesala da feira de Conxemar que abre mañá as súas portas coa presenza de 740 empresas de 48 países.
Publicado por o día 02/10/2018 na sección de Concello de Vigo,Galicia,Vigo

Font celebra que a ampliación do Ifevi permita a Conxemar aumentar a súa capacidade nun 20%

O Vigo é durante esta semana capital mundial da pesca grazas á celebración de Conxemar, unha das feiras do produto conxelado máis importantes do mundo e que se celebra desde mañá e ata o xoves no Ifevi. A antesala deste evento é a celebración, hoxe, do VII Congreso Internacional sobre Produción Pesqueira Mundial, que reúne a 400 dos maiores expertos do sector, tanto científicos como empresarios e representantes políticos.

Á inauguración do evento acudiu, en representación do alcalde, que se atopa en Madrid por motivos de axenda, o segundo tenente de Alcalde e concelleiro de Seguridade, Carlos López Font; o presidente de Conxemar, José Luis Freire; o director da División de Políticas e Recursos de Pesca e Acuicultura da FAO, Manuel Barange; a conselleira de pesca, Rosa Quintana; o delegado de Zona Franca, David Regades, e o presidente do Porto; Enrique López Veiga, entre outros.

“Este ano vemos cumprido un soño: o crecemento de Conxemar nun 20% da súa capacidade, o que nos dará aínda maior presenza mundial”, destacou López Font, á vez que mostrou o seu orgullo de que “a feira se complete con este debate científico sobre produción pesqueira, tan importante para asegurar o futuro do sector”.

Font lembrou que o ano pasado este foro de debate centrouse no cambio climático e “esta edición falarase da dispoñibilidade da materia prima, a evolución da demanda e a sustentabilidade do mercado; temas todos eles de interese para o sector pero tamén para os representantes políticos desta cidade”.

O congreso -organizado conxuntamente por Conxemar e pola Organización das Nacións Unidas para a Alimentación, a FAO- está centrado nesta edición na capacidade dos caladoiros, o nivel de sustentabilidade e o presente e futuro da produción pesqueira. Durante todo o día intervirán representantes do Banco Mundial, OCDE, Nacións Unidas, Oenegués,
Organización Mundial de Comercio, a FAO e altos executivos do sector privado.