Galicia conta xa coa primeira das cinco patrulleiras previstas no Plan de renovación parcial da frota de Gardacostas

A esta embarcación súmase outra xa en construción, dúas que acaban de ser adxudicadas e unha última de altura da que o Executivo galego xa iniciou os trámites para contratar a súa subministración
Publicado por o día 04/03/2019 na sección de Galicia,Mar,Moaña,Naval

Galicia conta xa coa primeira das cinco patrulleiras previstas no Plan de renovación parcial da frota de Gardacostas

A conselleira do Mar, Rosa Quintana, asistiu hoxe ao acto de entrega da primeira das catro patrulleiras que o estaleiro Rodman Polyships se adxudicou no marco do proceso de renovación parcial da frota do Servizo de Gardacostas de Galicia deseñado pola Xunta. O plan do Executivo galego conta cun orzamento total de máis de 10 millóns de euros entre os anos 2018 e 2020 e inclúe tamén a construción dunha embarcación de altura que substituirá á ‘Paio Gómez Chariño’.

Todas estas unidades son aptas para tarefas de inspección e vixilancia pesqueira, control e apoio á frota, colaboración en operacións de busca e salvamento e participación en actividades de loita contra a contaminación mariña. Neste sentido, a titular de Mar destacou que a mellora dos medios de intervención marítima deste organismo público é unha aposta blindada do Executivo galego e que este plan de renovación parcial da frota vai permitir contar con embarcacións máis modernas e eficientes, o que axudará a avanzar en que a comunidade teña cada vez un mar máis seguro.

A patrulleira lixeira entregada hoxe á Xunta, a ‘Punta Promontoiro’, é a primeira das dúas que se adxudicou por contrato este estaleiro de Moaña en xuño do ano pasado. A súa base estará en Celeiro (Lugo) e relevará á embarcación ‘Pena Trevinca’, con base en Portonovo (Pontevedra), que a Consellería do Mar doará á Cruz Vermella. A segunda unidade incluída nesta licitación, cun orzamento de 1,7 millóns de euros, será entregada nas próximas semanas pois agora atópase en pleno proceso de construción.

O estaleiro Rodman será tamén o encargado de subministrar outras dúas patrulleiras lixeiras para o Servizo de Gardacostas pois acaba de adxudicarse por case dous millóns de euros o segundo contrato realizado polo Executivo galego no marco do plan de renovación parcial da frota do organismo público. Pendente de adxudicar só queda a patrulleira de altura que substituirá á ‘Paio Gómez Chariño’, da que o Consello da Xunta aprobou o mes pasado a licitación do contrato para a súa construción por ata 6,5 millóns de euros.

A conselleira do Mar detallou durante a visita ao estaleiro que a aposta do Executivo galego por mellorar as prestacións do Servizo de Gardacostas queda patente nos orzamentos deste ano cunha suba do 5% nos fondos destinados a este ente público, ata os 14 millóns de euros. Á modernización dos medios do organismo tamén se suman as incorporacións rexistradas nos últimos anos ao seu cadro de persoal, que conta con 42 novos profesionais.

A embarcación entregada hoxe á Xunta é de tipo monocasco e conta cun acabado do máis alto nivel de calidade para os barcos profesionais desta clase. A súa eslora é de 17 metros, ten unha manga de 5 metros e o calado é de 0,9 metros. Entre as súas prestacións está acadar os 36 nós de velocidade máxima, 33 de velocidade cruceiro e unha autonomía mínima a 19 nós de 553 millas náuticas.

Comentar noticia

Your email address will not be published.