Galicia en Común sinala a Feijóo por demorar a información sobre a fusión da caixas: «Non quere que as galegas saiban a verdade da estafa antes de votar»

Eva Solla: “Esiximos que se proporcione esa información e comprometémonos a auditar o proceso de venda das caixas cando cheguemos ao goberno da Xunta para que a información sexa coñecida por todos os galegos e galegas”
Publicado por o día 10/07/2020 na sección de En Común Unidas Podemos,Galicia,Política,Vigo

Galicia en Común sinala a Feijóo por demorar a información sobre a fusión da caixas: «Non quere que as galegas saiban a verdade da estafa antes de votar»

Galicia en Común-Anova Mareas denunciou este venres a que Feijóo dilata a entrega da documentación sobre a fusión das caixas de aforro para que a cidadanía non coñeza toda a verdade sobre esta operación cando acuda a votar o 12 de xullo.

A cabeza de lista por Pontevedra, Eva Solla, o voceiro do Grupo Común da Esquerda, Antón Sánchez, e o concelleiro da Marea de Vigo, Rubén Pérez lembraron que o 22 de xuño o TSXG ditou unha sentenza que condena a Xunta de Galicia por vulnerar os dereitos de Sánchez como paralmentario ao negarlle reiteradamente información transcendental sobre a fusión das caixas, que acabou co espolio do 40% do aforro dos galegos e galegas.

A documentación que a Xunta debe entregar é o informe de proposta de fusión das caixas de aforros da conselleira de Facenda naquela altura, Marta Fernández Currás, así como a acta da reunión de secretarios xerais previa ao Consello da Xunta no que se autorizou a fusión.

“Levamos 2 lexislaturas tentando coñecer o proceso de espolio do aforro das galegas e galegos que supuxo a fusión das caixas, levando por diante 8 mil millóns de euros públicos”, incidiu Solla. “Na comisión parlamentaria das caixas tivemos unha documentación incompleta porque o PP de Feijóo empeñouse en que non se coñecera a información, xa que deixaría ás claras este proceso de roubo e espolio”.

A candidata manifestou o compromiso da coalición para “auditar o proceso de venda das caixas cando cheguemos ao goberno da Xunta para que a información sexa coñecida por todos os galegos e galegas”. Ademais, sinalou que, tal como contempla o programa da formación para o 12X “impulsaremos unha banca pública, da que carecemos actualmente”.

Antón Sánchez apuntou que “tivemos que estar anos pleiteando e pelexando por unha información que pertence á cidadanía galega. Vulneráronse os dereitos de toda a cidadanía a saber que aconteceu con esta estafa, a máis importante en décadas neste país nunha operación avalada por mentiras”.

“Feijóo dixo que non había nada que ocultar, pero a ocultación, a opacidade, a mentira e a manipulación que utiliza sistematicamente o PP é o caldo de cultivo perfecto para poder perpetrar estes grandes roubos”, criticou. Así, Sánchez afirmou que “se a cidadanía coñece a información, o 12X apostará pola decencia e a honradez. Queremos sacar a esa banda de ladróns do goberno coa verdade”.

Pola súa banda, Rubén Pérez resaltou que en Vigo a fusión “supuxo unha perda patrimonial brutal, que aínda está por cuantificar”. Desta maneira, anunciou o rexistro dunha moción “para que tamén o Concello de Vigo se pronuncie, toda vez que toda a comarca sufriu un auténtico espolio con esa fusión”