Galicia encabeza en xullo o crecemento turístico de España, con máis de 675.000 viaxeiros e 1,7 millóns de pernoitas

É, tras Asturias, a Comunidade cun incremento máis intenso recibindo preto de 43.000 viaxeiros máis que en xullo do ano pasado e case 118.000 noites máis
Publicado por o día 30/08/2019 na sección de Turismo

Galicia encabeza en xullo o crecemento turístico de España, con máis de 675.000 viaxeiros e 1,7 millóns de pernoitas

Galicia continúa a situarse, tamén en verán, entre as comunidades nas que o turismo está a medrar de xeito máis intenso este ano. De feito, no mes de xullo foi a segunda, tras Asturias, con mellor comportamento, superando nun 7% o volume de noites nos establecementos regrados ao ano pasado.

O Instituto Nacional de Estatística (INE) fixo hoxe públicos os datos referidos aos establecementos extrahoteleiros, que inclúen turismo rural, cámpings e apartamentos turísticos, que se suman aos de hoteis e pensións difundidos a semana pasada. Así, nese mes, estes establecementos recibiron no seu conxunto máis de 675.000 viaxeiros, un 6,7% máis que no mesmo mes do ano pasado, que fixeron máis de 1,7 millóns de noites. Son preto de 43.000 viaxeiros máis que hai un ano e preto de 118.000 noites máis.

A evolución foi positiva en todas as modalidades de aloxamento, cun incremento da demanda dun 7,2% en segmentos como o turismo rural, que recibiu máis de 29.000 viaxeiros que fixeron máis de 65.000 noites. Pola súa banda, máis de 75.000 turistas escolleron en xullo os cámpings galegos, rexistrándose máis de 319.000 noites, o que supón un incremento do 5,6%. Pola súa banda, nos apartamentos turísticos aloxáronse preto de 24.000 viaxeiros, que fixeron máis de 111.000 noites, cun incremento do 21%.

En xullo houbo máis viaxeiros, tanto españois como estranxeiros, sendo o crecemento máis intenso nestes últimos, con preto do 11% máis que en xullo do ano pasado. A estadía media tamén medrou, en concreto preto dun punto porcentual, acumulando así catro anos consecutivos de mellora da estadía media regrada en Galicia no primeiro mes do verán.