Galicia incorpora nun só ano 4.500 novas hectáreas de agricultura ecolóxica e achégase así ao obxectivo marcado para 2021

A comunidade pecha 2017 con máis de 32.200 hectáreas certificadas, que supoñen un crecemento do 16,3% respecto ao exercicio anterior
Publicado por o día 16/02/2018 na sección de Alimentación

Galicia incorpora nun só ano 4.500 novas hectáreas de agricultura ecolóxica e achégase así ao obxectivo marcado para 2021

Galicia pechou o 2017 con 4.526 novas hectáreas de agricultura ecolóxica, o que supón un incremento do 16% respecto ao ano anterior, e que acerca a comunidade aos restos establecidos para 2021. En concreto, grazas a estas cifras, nun só exercicio superouse xa a metade do obxectivo marcado no Plan de fixación da poboación no medio rural, que establecía 7.880 novas hectáreas certificadas para o final da lexislatura.

Estas cifras provisionais foron adiantadas pola conselleira do Medio Rural, Ángeles Vázquez, a falta de que se peche o balance anual completo, durante a súa visita á feira máis importante do sector a nivel internacional, Biofach, en Núremberg (Alemaña) . “En base aos datos actuais podemos dicir que nun só ano, xa temos conseguido o 57% das previsións”, explicou a titular deste departamento e indicou que Galicia supera xa as 32.200 hectáreas de ecolóxico.

Por provincias, Lugo segue a liderar este ámbito na comunidade con 14.937 hectáreas, seguida de Ourense (8.199 ha), Pontevedra (5.769 ha) e, por último, A Coruña (3.336 ha). Neste sentido, hai claras tendencias por provincias, mentres que Lugo e Ourense teñen un carácter máis gandeiro, A Coruña e Pontevedra destacan en cultivos vexetais.

Respecto aos operadores, no 2017 alcanzáronse os 1.062 operadores certificados, o que supón un aumento do 12,4% respecto ao ano anterior. E precisamente Ángeles Vázquez aproveitou a presenza de once empresas galegas neste evento para agradecerlles o seu traballo e “dinamismo” xa que é grazas a produtores e comercializadores implicados polo que este sector non deixa de crecer en Galicia.

Punteira en España

A conselleira estivo acompañada pola directora xeral de Gandaría, Agricultura e Industrias Agroalimentarias, Belén do Campo, e polo presidente do Consello Regulador de Agricultura Ecolóxica (Craega), Francisco López. Ángeles Vázquez destacou a importancia deste órgano na mellora continuada do sector, que se sitúa á cabeza de España en moitos ámbitos como o leiteiro. Galicia, con 86 granxas, é a primeira comunidade en explotacións de leite ecolóxico que se traducen en máis de 7.900 quilos de leite cru e 829.000 quilos de iogur. Supoñen as maiores contribucións ao estado español con case o 61% e o 54% da produción total, respectivamente.

Ademais, a nosa é a segunda comunidade despois de Cataluña de produción de aves de curral para carne e aquí prodúcense ata 12,5 millóns de ovos, o 26% de España. Tamén obtemos o segundo posto en apicultura con 42 explotacións ecolóxicas.

Biofach

As once empresas presentes nos dous stands galegos foron Mieles Anta (mel e outros produtos apícolas), Orballo (plantas aromáticas, especias e arroces), Coren (ovos e polos), Producto de Aldea (viños), Bio Factory (xeados), Hifas da Terra (cogomelos), Galletas Mariñeiras Daveiga, Porto-Muíños (algas) e Conservas Orbe, Connorsa e Pasteurizados Cíes (conservas de pescados e moluscos).

A feira Biofach de Nüremberg comezou o pasado mércores e pecharase mañá, sábado. Na última edición chegou aos 51.453 visitantes profesionais con 2.793 expositores procedentes de 88 países.