Galicia participa nas feiras internacionais do libro Líber (Barcelona) e Frankfurt

Estes eventos buscan situar a produción galega nos mercados máis importantes e favorecer as relacións comerciais entre as editoriais
Publicado por o día 03/10/2018 na sección de Cultura

Galicia participa nas feiras internacionais do libro Líber (Barcelona) e Frankfurt

A Consellería de Cultura e Turismo estará presente nas Feiras Internacionais do Libro Líber, en Barcelona, e na de Frankfurt. En concreto, a Feira Líber este ano celébrase en Barcelona desde este mércores día 3 ata o venres 5. Pola súa banda, a de Frankfurt terá lugar do 10 ao 14 de outubro.

Cómpre resaltar que estas feiras forman parte das actividades que realiza a Consellería relacionadas coa promoción da cultura galega, en xeral, e coa produción creadora e editorial en particular, fóra do territorio da comunidade. Estas accións buscan situar á produción galega nos mercados internacionais, e tamén incorporar á cultura galega o máis interesante da produción mundial, a través dos correspondentes intercambios intelectuais e comerciais.

Na primeira feira, a de Líber –que se celebra alternativamente entre Madrid e Barcelona–, a Xunta de Galicia conta con stand propio de 36 metros cadrados. Nel, ademais do espazo expositivo, poden desenvolver o seu labor as editoras galegas que acoden de maneira presencial á feira, que son Hércules de Ediciones, Alvarellos Editora, Kalandraka Editora, Arnoia Distribucións, Edicións Laiovento, Baía Edicións e Editorial Galaxia. No caso da feira de Frankfurt, o stand é menor, de 24 metros cadrados.

Estas dúas feiras teñen un carácter fundamentalmente comercial, que aproveitan as firmas editoriais galegas para establecer relacións que contribúan a nutrir o sistema cultural galego e darlle presenza no exterior.