Galicia solicita á Unión Europea que teña en conta a prohibición dos descartes no establecemento das cotas de pesca do Báltico e do resto das súas augas

A comunidade autónoma galega solicita que o Consello de Ministros sexa unitario e manteña os mesmos criterios de reparto tanto para o Báltico como para o resto das augas da Unión Europea
Por o 15/10/2018 | Sección: Mar
Galicia solicita á Unión Europea que teña en conta a prohibición dos descartes no establecemento das cotas de pesca do Báltico e do resto das súas augas

Galicia defende a necesidade de que a Unión Europea teña en conta a prohibición dos descartes de pesca no establecemento das cotas de pesca do Báltico e do resto das súas augas. Este é un dos aspectos nos que fai fincapé a comunidade autónoma galega en relación ao establecemento das posibilidades de pesca no mar Báltico, un dos asuntos do Consello de Ministros de Pesca que se está a celebrar en Luxemburgo e ao que asiste a conselleira do Mar, Rosa Quintana, xunto co ministro de Agricultura, Pesca e Alimentación, Luis Planas, en representación do resto das comunidades autónomas españolas en materia de pesca.

En relación a este aspecto hai que destacar que Galicia non posúe intereses directos de pesca no mar Báltico, pero si é de relevancia, xa que nela se deciden os principios de TACs e cotas para determinados países. Neste sentido, Galicia fai fincapé unha vez máis na necesidade de que o Consello de Ministros sexa unitario e manteña os mesmos criterios de reparto tanto para o Báltico como para o resto das augas da Unión Europea. Un posicionamento que se pon de relevo de cara ao Consello de Ministros de decembro, que é o decisivo, xa que nel se negocian e acordan as posibilidades de pesca dos Estados Membros para todo o ano 2019.

De cara a este reparto no Báltico, Galicia tamén fai fincapé na necesidade de flexibilizar prohibición dos descartes e suxire diferentes medidas, entre elas a aplicación de incrementos destinados a paliar a aplicación da obriga de desembarque de capturas e a eliminación dos TAC naquelas especies sen risco de conservación, de escasa relevancia de captura.

A maiores, neste Consello de Ministros tamén se intercambiaron pareceres sobre as consultas anuais de 2019 da UE con Noruega. Neste punto Galicia solicita que se manteñan os criterios establecidos como froito do acordo entre UE e Noruega. Neste sentido, a comunidade autónoma galega considera que se deben tratar de maximizar as posibilidades de pesca do bacallau coñecido como “bacallau de cohesión”, sen afectar ao intercambio de especies que tamén son imprescindibles para o desenvolvemento da boa actividade pesqueira da frota galega.

Comentar noticia

Your email address will not be published.