Luís Bará: “Galiza debe coidar das súas potencialidades no sector vitivinícola e só o BNG é unha garantía”

O cabeza de lista de BNG-Nós ao Congreso visitou hoxe viñedos e adegas do Condado do Tea para coñecer a situación e necesidades dos produtores
Publicado por o día 18/06/2016 na sección de BNG,Elecciones 26J,Política

Luís Bará: “Galiza debe coidar das súas potencialidades no sector vitivinícola e só o BNG é unha garantía”

O nacionalista, ao carón do Miño, asegurou que Galiza debe ter unha tarifa eléctrica propia por ser unha grande produtora de enerxía

O cabeza de lista do BNG-Nós para o Congreso pola provincia de Pontevedra, Luís Bará, puxo hoxe o sector do viño como exemplo das potencialidade de Galiza para xerar riqueza e emprego. O nacionalista asegurou que este sector é un dos poucos que está en expansión no país, crecendo diariamente en exportación, polo que subliñou que debe contar cun apoio claro e explícito das administracións tendo en conta as súas peculiaridades. “É preciso que haxa forzas galegas nas institucións para apoiar as iniciativas que sacan Galiza adiante e defender o noso dereito a producir. O BNG ten que estar no Congreso para dar voz a este sector, xa que só os nacionalistas son garantía para coidar das potencialidades do sector vitivinícola de Galiza fronte a outros intereses do estado”, asegurou.

Bará fixo estas declaracións durante unha visita aos viñedos Agromiño en Crecente e á Adega Eidosela en Arbo, onde produtores e cooperativistas de adegas lle transmitiron as súas preocupacións e necesidades. Os viticultores explicaron a Bará que botan en falta as mesas do viño nas que se marcaba un prezo mínimo para as uvas asinando un contrato homologado que garantía a venda por enriba dos custes. Asimesmo, sinalaron que a día de hoxe apenas existen axudas europeas aos viñedos, xa que “esgotáronse os cartos de Bruxelas tanto para os cultivos ecolóxicos como para a loita integrada”.

Por outra banda, Bará recolleu a necesidade de contar con máis terras para ampliar producións e de concentrar as existentes para facilitar o traballo. Así mesmo, coñeceu o medo por que grandes adegas de fóra de Galiza se fagan con terras e planten viñedos en zonas da DO xerando unha grande competencia: “Na zona do Ulla, onde hai unha baixada grande dos prezos dos terreos polos fracasos de granxas, esa é unha ameaza real; de feito, xa hai moitas grandes marcas que se están a implantar en Galiza adquirindo adegas”, salientou un dos viticultores. Por outra banda, tamén se puxo sobre a mesa a necesidade de control da venda de uva non regulada e do etiquetado dos viños.

Fronte a esta situación, o cabeza de lista do BNG-Nós subliñou que é preciso defender e desenvolver os recursos de Galiza con ferramentas políticas e financeiras que deixen aproveitar a riqueza propia. “O BNG será unha desas ferramentas en Madrid, no Congreso, porque está claro que defenderá os intereses do sector do viño galego fronte a outras localidades do estado. Outras forzas defenderán os intereses doutras denominacións. Nós está claro que defenderemos os intereses de Galiza”, salientou, “xa que apostamos pola expansión e impulso dos nosos recursos e permitir así o crecemento da economía e a xeración de riqueza e de emprego na nosa terra”.

As adegas Eidosela, que Bará visitou hoxe, creáronse no ano 2007 formadas por 60 socios con terreos situados nos sete concellos do Condado do Tea. Actualmente a cooperativa traballa cunha media de 400.000 quilos de uva e destina máis dun 30% do seu viño á exportación, sobre todo a Estados Unidos, pero tamén a Reino Unido, Australia, China ou á Europa Continental. A súa aposta por novos produtos (como o espumoso) ou pola adaptación aos mercados de destino está facendo que o seu crecemento sexa constante.

Enerxía

Por outra banda, Bará visitou as pesquerías do Miño e coñeceu as problemáticas que supoñen as continuas crecidas no río producidas polos encoros de aproveitamento hidroeléctrico. O candidato lembrou que Galiza é unha potencia na creación de enerxía, mais subliñou que non se está a beneficiar de ser unha grande produtora, senón que só sufre as consecuencias.

“Galiza exporta o 40% da enerxía que produce, mais en lugar de ter unha tarifa propia, paga igual que o resto do estado”, criticou, para engadir que O BNG considera que os galegos e galegas, xunto coas industrias asentadas no país, deberían pagar un recibo alomenos un 30% máis barato. “Eso suporía unha grande vantaxe para o país”, destacou.