GañaMós presentara unha moción para o rexeitamento da sentenza de “La Manada” no concello de Mós

Publicado por o día 07/05/2018 na sección de GañaMOS,Política

GañaMós presentara unha moción para o rexeitamento da sentenza de “La Manada” no concello de Mós

As institucións deben facerse eco do rexeitamento da sociedade a senteza de “La Manada” e pór de verdade todos os medios para que as mulleres non sigan sendo dobremente vítimas: por parte dos agresores e por parte dunhas institucións asentadas no patriarcado e na criminalización das agredidas.

Por todo isto, GañaMós solicitara no Pleno que o Concello de Mós asuma os seguintes acordos:

PRIMEIRO.- Manifestar o seu rexeitamento á sentenza e á interpretación legal realizada polos maxistrados da Audiencia de Navarra, entendendo que si existiu intimidación e, polo tanto, unha violación que debe ser considerada agresión sexual, e non abuso, tal e como se establece nos artigos 178 e seguintes do Código Penal.

SEGUNDO.- Denunciar o feito de que as mulleres sigamos sendo dobremente vítimas: por parte dos agresores e por parte dunhas institucións asentadas no patriarcado e na criminalización das agredidas.

TERCEIRO.- Instar ao Goberno e ás Cortes a levar a cabo as políticas e iniciativas lexislativas precisas para equiparar normativamente a ausencia de consentimento á súa negativa no eido dos delitos contra a liberdade e a indemnidade sexuais.

CUARTO.- Introducir ou intensificar, nas políticas do noso Concello, a perspectiva de xénero para garantir un sistema máis xusto e democrático ás mulleres que residen nel.

QUINTO.- Instaurar medidas reais de empoderamento das mulleres en tódolos ámbitos, nomeadamente nas institucións; así como garantir instrumentos de concienciación social que sirvan para educar na igualdade e na liberdade das persoas coa fin de rematar coas violencias machistas.