Gómez Reino reivindica a CRTVG como servizo público para que deixe de ser unha “máquina de propaganda ao servizo de Feijóo

Publicado por o día 17/04/2020 na sección de En Común Unidas Podemos,Galicia,Política

Gómez Reino reivindica a CRTVG como servizo público para que deixe de ser unha “máquina de propaganda ao servizo de Feijóo

O voceiro de Galicia en Común-Anova Mareas, Antón Gómez Reino, defendeu hoxe a necesidade de que a Xunta deixe de manipular os medios públicos galegos en favor dos intereses electorais do Partido Popular, do Goberno da Xunta e do seu presidente, Alberto Núñez Feijóo, e reclamou unha Corporación da Radio Televisión de Galicia (CRTVG) autónoma, independente e rigorosa que cumpra a súa función de informar con neutralidade e pluralidade á cidadanía galega.

“Hoxe cúmprense 100 venres negros nos que os traballadores da CRTVG levan manifestándose desde hai máis de dous anos pola liberdade de expresión, contra a manipulación informativa e contra as represalias que sofren as compañeiras e compañeiros que se opoñen a esa maquinaria de propaganda que o Goberno galego ten querido construír cos medios públicos galegos”, dixo.

O voceiro da coalición puxo como exemplo “o silencio informativo” decretado pola CRTVG fronte ás denuncias de Galicia en Común sobre o retraso no cobro da prestación de desemprego que están a padecer miles de traballadoras afectadas por expedientes de regulación temporal, cuxa tramitación corresponde á Xunta e que veñen de ser adiados por decisión do Goberno galego.

“O tratamento dese asunto na Televisión de Galicia foi cero minutos. Por que non teñen dereito os galegos e as galegas a dispoñer desa información para formarse unha opinión sobre asuntos esenciais que lles afectan?”, inquiriu.

Gómez Reino subliñou que a crise sanitaria e a emerxencia social derivada da epidemia de Covid-19 teñen posto de relevancia, máis que nunca, a necesidade de contar “con medios de comunicación autónomos, veraces e independentes”.

“Saímos todas as tardes a aplaudir a sanitarios, transportistas, policías produtores e distribuidores de alimentos… pero tamén aos xornalistas e ás xornalistas, que están cumprindo unha función esencial e que están a defender dereitos esenciais” da cidadanía”, engadía o voceiro.

“Hai que dicilo”, remarcou, “a liberdade de expresión non pertence a ningún Goberno, a ningún partido, a ningún editor nin a ningún grupo de comunicación. Pertence ao conxunto da cidadanía. Unha televisión pública non ten que ser nin de esquerdas nin de dereitas, nin do Goberno nin da oposición. Ten que ser un servizo público ao servizo da cidadanía”.

Finalmente, o voceiro de Galicia en Común-Anova Mareas manifestou o apoio da coalición aos profesionais do sector dos medios de comunicación, “que tamén están arriscando a súa saúde saíndo as rúas e o día a día coas súas familias para manternos informados”.

En particular, Gómez Reino quixo manifestar a súa solidariedade cos traballadores de empresas xornalísticas galegas que están a padecer expedientes de regulación de emprego ou situacións laborais difíciles, como os do Faro de Vigo, La Opinión, El Progreso, El Correo Gallego y La Voz de Galicia, entre outros.

Una respuesta para "Gómez Reino reivindica a CRTVG como servizo público para que deixe de ser unha “máquina de propaganda ao servizo de Feijóo"

  1. Gamela   18/04/2020 at 8:02

    Primeira noticia que temos: de que os ERTEs están sendo adiados polo goberno da Xunta de Galicia (?)

    De ser certo, bastaría que a flamante Ministra de Traballo, Yolanda Díaz, abrise a boca un minuto na entrevista que lle fixo onte mesmo Xabier Fortes na TVE e en lugar de dicir que os traballadores cobrarían o 3 de maio, podería ENGADIR que a culpa a tiña a Administración galega (?) Así todos teríamos noticia desta situación.

    En canto a LIBERDADE de información e de OPINIÓN estamos a ver como o Goberno Sánchez comeza a dar mostras de CENSURA PREVIA moi preocupantes (?) A ver se imos saír da sartén para caer no lume ?

    Vivir 36 días sen dereitos fundamentais, baixo control policial ABUSIVO, con máis de 670.000 multas e subindo a unha media de 20.000 denuncias diarias… NON é para presumir precisamente de Estado Democrático (?)

    Así nacen os Tiranos ?

    https://twitter.com/00Gamela/status/1251248373669269506

    Liberdade 25 de Abril !!!

    Responder

Comentar noticia

Your email address will not be published.