Gonzalo Caballero, no cumio municipal do PSdeG: “Os alcaldes e alcaldesas socialistas son o espello para abrir unha páxina de progreso na Xunta tralo 12X”

O candidato do PSdeG avanza “un goberno galego en sintonía cos alcaldes e alcaldesas socialistas”, que están cubrindo “as ineficiencias” de Feijóo
Publicado por o día 20/06/2020 na sección de Política,PSOE

Gonzalo Caballero, no cumio municipal do PSdeG: “Os alcaldes e alcaldesas socialistas son o espello para abrir unha páxina de progreso na Xunta tralo 12X”

O candidato socialista á Presidencia da Xunta, Gonzalo Caballero, reuniu hoxe nunha xuntanza histórica aos alcaldes e alcaldesas de Vigo, A Coruña, Santiago, Lugo e Ferrol, así como aos presidentes das Deputacións da Coruña e Lugo, á presidenta da Deputación de Pontevedra e ao presidente da Fegamp, para comprometer un goberno galego “en sintonía” cos principais gobernos locais.

De feito, Gonzalo Caballero situou este cumio histórico do poder municipal socialista como a evidencia “do progreso que quere a xente”, toda vez que máis da metade dos galegos e das galegas teñen hoxe un alcalde ou alcaldesa do PSdeG.

Ademais, o dirixente socialista reivindicou que esta imaxe dos cargos municipais do PSdeG constitúe “o mellor exemplo do que queremos facer” á fronte da Xunta. “Os nosos alcaldes e alcaldesas son a referencia para un goberno mellor para Galicia, son o espello para abrir unha páxina de progreso na Xunta tralo 12 de xullo”, recalcou.

E é que, como dixo Gonzalo Caballero, os máis de cen alcaldes do PSdeG representan “o progreso, o benestar, a estabilidade e as oportunidades para a cidadanía”. “O impulso municipalista dános a forza para abrir unha etapa de progreso en Galicia”, incidiu, en presencia tamén do voceiro socialista en Ourense, Rafael Rodríguez Villarino, quen encabezou a lista máis votada na cidade das Burgas nos últimos comicios locais.

“Queremos un goberno da Xunta en sintonía cos representantes municipais, que están a pé da cidadanía e dando respostas aos problemas dos veciños e veciñas”, reivindicou Gonzalo Caballero, quen exemplificou isto na crise da covid. “Os concellos socialistas cubriron as ineficiencias e a xestión nefasta de Feijóo, que foi un escapista das súas responsabilidades”, recalcou.

“UN NOVO TEMPO”

Así pois, o candidato socialista apelou a “marcar un novo tempo” a partir do 12X, porque Galicia necesita “un goberno progresista en sintonía cos alcaldes”.

Sobre todo, apostilou, á vista do “fracaso” de Feijóo, quen, tras 11 anos, deixa Galicia con 70.000 ocupados menos, con 2.000 millóns de euros menos na sanidade pública, con 500 camas menos nos hospitais públicos, cun modelo de privatización das residencias de maiores e sen compromiso económico e industrial.

Precisamente por iso, pensando na reconstrución de Galicia trala covid, Gonzalo Caballero comprometeu “un gran acordo” do vindeiro presidente da Xunta con todo o poder local “para trazar unha folla de ruta” que permita que a saída da crise “non deixe a ninguén na cuneta”.

Comentar noticia

Your email address will not be published.