O secretario xeral do PSdeG, Gonzalo Caballero, participou este domingo en Santiago na presentación das candidaturas socialistas ao Congreso e ao Senado nas catro provincias galegas e aproveitou para sinalar que “o PSOE é o voto útil para o progreso e o avance fronte á ameaza da dereita que abrazou á ultradereita”.

Neste arranque da precampaña cara as eleccións xerais, o líder dos socialistas galegos puxo o foco en que esta é unha cita “de máxima importancia”, na medida en que está en xogo permitir que siga “o modelo de progreso, de avance e de prioridade social” que encabeza Pedro Sánchez ou optar por “o regreso ao pasado”.

De feito, Gonzalo Caballero destacou como, en oito meses, o goberno socialista permitiu que “a recuperación económica chegue a todos”, a través de medidas como a suba do SMI, das pensións e dos salarios dos empregados públicos, os plans de emprego e de retorno dos mozos, a universalización da sanidade ou os plans de apoio e protección para os autónomos e os maiores de 52 anos no desempleo.

Fronte a isto, o máximo dirixente do PSdeG sinalou que a dereita “presenta tres papeletas” que se resumen en “retroceso” e “regreso ao pasado” e que implican “decisións moi negativas para a maioría”. “É unha ameaza para os dereitos da maioría”, recalcou.

Con estas cuestións en mente, Gonzalo Caballero avanzou unha campaña “con toda a forza, todo o impulso e toda a ilusión” e “chea de argumentos” para saír a convencer á cidadanía e afianzar, tamén en Galicia, “unha maioría sólida, ampla e suficiente para que Pedro Sánchez siga sendo presidente do goberno para a maioría”. “Este proxecto ten que seguir adiante”, destacou.

“O PSOE AVANZA”

En canto ás enquisas que se van coñecendo, o secretario xeral constatou que o PP “ten o retroceso electoral máis profundo da súa historia” e que en Galicia, como en toda España, “o PSOE é a única forza das existentes actualmente que vai avanzar en votos e en escanos”.

Iso si, tras advertir de que os sondeos reflicten “un incremento de Vox e de Ciudadanos mentres o PP afúndese”, Gonzalo Caballero saudou o ciclo que se abre coa “nova maioría” que representan as forzas progresistas nesta comunidade. “Permitirá poñer fin á etapa de Feijóo”, concluíu.

Finalmente, á vista de que Pablo Casado estivo esta mañá en Vigo xunto con Feijóo, o líder socialista aproveitou para preguntarlles “por que se abrazan a ultradereita”. “Por que prefiren abrazar á ultradereita e abandonar ao electorado moderado, en vez de ser leais co modelo constitucional?”, inquiriu.

Noticias Vigo

Noticias de última hora en Vigo