Un home falece en Coristanco nun accidente co tractor que manexaba

Por o 20/02/2018 | Sección: Sucesos
Un home falece en Coristanco nun accidente co tractor que manexaba

Un home faleceu esta tarde nunha leira de Coristanco ao quedar atrapado entre as cadeas e unha roda do tractor que conducía. Os feitos ocorreron no lugar do Anido, na parroquia de Agualada.

O 112 Galicia tivo constancia dos feitos ás 16:25 horas a través da alerta do 061-Urxencias Sanitarias, que mobilizou ata o lugar do accidente ao helicóptero medicalizado con base en Santiago.

Nada máis recibir o aviso, dende o Centro Integrado de Atención ás Emerxencias (CIAE) 112 Galicia informouse do sucedido ao Grupo de Emerxencias Supramunicipal (GES) de Ponteceso, aos Bombeiros de Carballo, a Protección Civil e á Garda Civil.

Unha vez na leira, os membros do Servizo de Prevención, Extinción de Incendios e Salvamento de Carballo empregaron o material de excarceración para liberar ao home. Xa accesible, os efectivos sanitarios nada puideron facer por salvar a vida do varón.

Trasladado en helicóptero
Por outra banda, en Lousame, un home resultou ferido despois de ser esmagado contra unha parede polo tractor que manexaba. O accidente tivo lugar en Silvarredonda, na parroquia de Vilacova, ao fío das 18:25 horas.

Debido á gravidade das feridas da persoa accidentada, o 061-Urxencias Sanitarias mobilizou ata o lugar dos feitos o helicóptero medicalizado con base en Santiago. Foi o persoal sanitario quen daba a voz de alarma ao 112 Galicia. Os técnicos sanitarios indicaban no seu relato que o home atopábase accesible.

Acto seguido, dende o CIAE pasouse o aviso á Garda Civil, aos Bombeiros de Boiro, ao GES de Brión e a Protección Civil.

Finalmente, o home ferido foi trasladado na aeronave ao Complexo Hospitalario Universitario de Santiago.