Homenaxe a Díaz Pardo no Día da galeguidade empresarial

Descubriuse un monumento fronte á facultade de Belas Artes que tamén acolle unha exposición sobre a figura do empresario galeguista até o vindeiro 22 de febreiro.
Publicado por o día 27/01/2019 na sección de Galicia,Pontevedra

Homenaxe a Díaz Pardo no Día da galeguidade empresarial

Pontevedra viviu a mañá do sábado a descuberta dunha escultura en homenaxe ao galeguista, artista e empresario Isaac Díaz Pardo con motivo do Día da galeguidade empresarial organizado polo Foro Enrique Peinador, co patrocinio do Concello de Pontevedra, que estivo representado na figura do alcalde, Miguel Anxo Fernández Lores.

A descuberta foi nos xardíns de Enrique Marescot, fronte á facultade de Belas Artes. O monumento leva colocado unha placa na que se pode ler: “Cando os anos me venzan, xa descomposto todo e farto de facer todo o que fago, non sei o que farei… Estou tan afeito a perder que non sei que facer se un día gaño”.

A continuación, os asistentes entraron na Facultade de Belas Artes para inaugurar a exposición “Isaac Díaz Pardo e Sargadelos. Apontamentos sobre arte, industria e deseño”. A exposición está comisariada por Silvia García González e estará aberta até o vindeiro 22 de febreiro en horario de luns a venres de 11.00 a 13.00 horas, e de 18.00 a 20.00 horas.

Discurso do alcalde con motivo da inauguración do monumento en homenaxe a Isaac Díaz Pardo

Díaz Pardo foi unha das grandes figuras galegas do século XX.

Pola súa dimensión artística, por suposto.

Pola súa dimensión empresarial, tamén por suposto.

Pola súa acción cultural, o mesmo digo.

Pero sobre todo porque foi unha das principais conexións deste país co mundo contemporáneo, un grandísimo creador de formas, dunha nova iconografía que fixo medrar o país dunha maneira exponencial.

Tanto o Laboratorio de Formas como as marcas Sargadelos e O Castro posicionaron a Galiza, dentro e fóra do seu territorio, como un país que bebe na súa tradición milenaria e as conecta coas formas e as maneiras máis vangardistas.

Nace así un universo de símbolos que hoxe, 60 anos despois, todos e todas levamos no adn como galegos. Eso, inocular no maxín dos galegos de hoxe todo un sistema de símbolos nacionais, debémosllo a Isaac.

Tanto é así, que no próximo campionato do mundo de triatlón, que teremos aquí a fins de abril, todos os participantes levarán na súa medalla unha desas formas baseadas na cultura primitiva dos petroglifos das Rías Baixas.

Unha forma que quixemos que parecese de Sargadelos, de Isaac, desa gran figura contemporánea deste país.

Moitas grazas por facer esta homenaxe diante precisamente da Facultade de Belas Artes, en Pontevedra, que quere ser un símbolo tamén hoxe desta Galiza contemporánea, revolucionaria e intelixente que quixo Isaac e que queremos nós.

Moitas grazas