Iniciada a mellora do Polígono do Rebullón

A obra inclúe dous proxectos, un de saneamento e outro de pavimentación. Os traballos estarán rematados a mediados de novembro
Publicado por o día 31/10/2017 na sección de Galicia,Mos

Iniciada a mellora do Polígono do Rebullón

A alcaldesa de Mos, Nidia Arévalo e a concelleira de Urbanismo, Julia Loureiro, informaron esta mañá de que onte comezaron as obras de mellora do Polígono do Rebullón, que inclúen sendos proxectos de saneamento e pavimentación necesarios para dar solución ás deficiencias existentes no polígono. Os traballos iniciados na xornada de onte corresponden á instalación do saneamento e prevese que estean rematados a mediados do mes de novembro.

A primeira fase, que é a que se está realizando e corresponde á acometida do saneamento, conta coa construción dun novo pozo de bombeo e instalación de tubería de pvc de 315 milímetros de diámetro.

A segunda fase, de asfaltado, consiste na solución técnicamente máis adecuada para mellorar o pavimento. Nesta fase executaranse as seguintes actuacións: fresado das zonas do pavimento existente nas zonas nas que as cotas das rasantes non son adecuadas a fin de mellorar a uniformidade superficial, e extendido de dúas capas de aglomerado en quente de 12 cm de espesor total, dado que o vial soporta un tráfico pesado. A lonxitude do vial a eixe é de 310 metros e o ancho é de 7 metros.

A fin de protexer o novo pavimento nas zonas nas que non existe urbanización lateral e de actuacións futuras como a instalación de beirarrúas ou aparcadoiros, prevese instalar unha liña de ‘bordillos’ por cada un dos lados, no límite lateral do pavimento, de xeito que este quede confinado e cos bordes ben delimitados.

Para evitar actuacións posteriores sobre o pavimento inclúese a execución dunha serie de cruces transversais coas súas correspondentes arquetas e zanxas lonxitudinais nos que se deixarán instaladas canalizacións que se estima serán necesarias no futuro para instalar servizos (electricidade, telecomunicacións …) que agora son aéreos.

Este macroproxecto consta de tres fases. As dúas primeiras, correspondentes á acometida de servizos, son as que se están a levar a cabo neste ano 2017, e a terceira de humanización realizarase no 2018.

Neste sentido a rexedora local mosense declarou que “por fin, nesta lexislatura quedará ordeado este parque empresarial e cun aspecto e dotacións dun auténtico polígono industrial”. O Concello, que conta co aopoio de AEMOS, lidera e coordina este ambicioso proxecto con financiación autonómica na súa maioría, e cunha parte tamén de aportación dos propios empresarios do polígono.

A a execución deste macroproxecto conta con sendas subvencións da consellería de Economía, Emprego e Industria con cargo a unha liña de axudas para a mellora de infraestruturas dos parques empresariais da Comunidade Autónoma de Galicia. Na Fase I de saneamento a administración autonómica aporta o 80% do custe total, que supón unha axuda económica de 95.990 euros. E na Fase II de pavimentación a Xunta asume tamén o 80% do orzamento total aportando 95.542 euros. En total a consellería inviste nesta obra preto de 200.000 euros.

O custe total dos traballos, incluíndo a terceira fase, superará os 500.000 euros.

Por último a rexedora local mosense, Nidia Arévalo, declarou a “necesidade de revalorizar esta zona industrial, estratéxica pola súa ubicación, pero que precisaba dunha mellora estructural importante e vital para a subsistencia do polígono”.