Irmandade de doadores de sangue de Vigo e ADROVI agasallarán aos doadores

Todas as persoas que acudan a doar ata as unidades móbiles ou ao punto fixo de doazón de Vigo, entre os días 1 e 23 de decembro, entrarán no sorteo de diversos obsequios cedidos por empresarios e particulares da cidade olívica.
Publicado por o día 01/12/2016 na sección de Vigo

Irmandade de doadores de sangue de Vigo  e ADROVI agasallarán aos doadores

 A Irmandade de Doadores de Sangue de Vigo e a Asociación de Doadores e Receptores de Órganos de Vigo (Adrovi) entregarán, entre os días 1 e 23 de decembro, a todas as persoas que acudan a doar sangue ata as unidades móbiles e ata o punto fixo de doazón da Axencia de Doazón de Órganos e Sangue (ADOS) en Vigo, unha rifa para o sorteo de distintos agasallos cedidos por empresarios e particulares da cidade olívica.

Entre os obsequios aos que poderán optar todos os doadores, salientar un balón de fútbol asinado polos xogadores do Celta Vigo. Deste xeito, Adrovi e a Irmandade de Doadores de Sangue de Vigo queren agradecer a todas as persoas que doan sangue o seu carácter xeneroso e solidario. Ademais, esta iniciativa coincide cunha época, como o mes de decembro, especialmente delicada, xa que o incremento das urxencias derivadas dos accidentes de tráfico por mor das pontes festivas, motiva o reforzo ao chamamento á activa participación dos doadores e doadoras de sangue.

Elevada participación

ADOS lembra que, no pasado ano 2015, Galicia contabilizou un total de 111.250 doazóns de sangue, cunha taxa de 41 doazóns por cada 1.000 habitantes e ano, superando en cinco puntos a media nacional. Neste punto, lembrar que a cidade de Vigo foi o concello con maior volume de doazóns de Galicia, acadando a cifra de 12.768, o que supuxo unha taxa de 43 doazóns por cada 1.000 habitantes e ano. Este excelente nivel de participación supuxo que Vigo contabilizase o 11,5% do volume total de doazóns rexistrado na nosa comunidade.

Tanto a Irmandade de Doadores de Sangue de Vigo como Adrovi e a Axencia de Doazón de Órganos e Sangue, queren amosar o seu agradecemento a todos os vigueses e viguesas polo seu carácter solidario, así como animalos a tomar parte nas campañas de doazón nesta recta final do ano.

Neste sentido, ADOS convida a todos os cidadáns e colectivos galegos a participar nas mesmas. Para iso pon a disposición da cidadanía a súa páxina web, ados.sergas.es; o enderezo de correo electrónico, doadoressangue.ados@sergas.es; o teléfono de información gratuíto; 900 100 828; e as súas páxinas nas redes sociais como xeito de comunicarse con ADOS ou resolver calquera dúbida relacionada coa doazón.