Lorenzana urxe ao Estado a coñecer os criterios de reparto e o orzamento que lle corresponde a Galicia dos fondos europeos para políticas de emprego

Lorenzana mostrouse preocupada pola intención do Goberno de executar directamente parte destes fondos, xa que lembrou que as políticas activas de emprego son competencia das comunidades autónomas
Publicado por o día 25/01/2021 na sección de Economía,Emprego,Xunta de Galicia

Lorenzana urxe ao Estado a coñecer os criterios de reparto e o orzamento que lle corresponde a Galicia dos fondos europeos para políticas de emprego

A conselleira de Emprego e Igualdade, María Jesús Lorenzana, participou hoxe por videoconferencia en Santiago de Compostela na reunión convocada pola ministra de Traballo e Economía Social, Yolanda Díaz, xunto co resto de conselleiros da área laboral, na que amosou a súa preocupación, xa que a día de hoxe non se coñece o orzamento que recibirá Galicia en materia de emprego a través dos fondos europeos Next Generation, nin tampouco os criterios de reparto. Lorenzana urxiu ao Estado a que convoque o antes posible a Conferencia Sectorial de Emprego, xa que é o órgano competente para a distribución destes fondos correspondentes ás políticas activas de emprego.

A conselleira explicou, ademais, que a intención do Estado é executar directamente parte destes cartos, o que afirmou que “lle preocupa, xa que as competencias nesta materia son das comunidades autónomas”. Por iso, insistiu na necesidade de coñecer os criterios que vai utilizar o Estado para executar directamente parte destes fondos “tan necesarios neste ano 2021”, engadiu.

Na xuntanza celebrada hoxe se abordou tamén a nova Estratexia Española de Emprego, que, en palabras da conselleira, ten “unha parte fundamental” relativa ás políticas de formación para o emprego. Ao respecto, criticou a falta de coordinación entre os ministerios de Educación e Traballo nesta materia e tamén o descoñecemento que existe sobre a contía e os criterios de reparto ao respecto. Así mesmo, a titular de Emprego destacou que as comunidades autónomas tampouco están informadas sobre a posibilidade de traspaso de fondos de emprego a formación, “unha flexibilidade moi necesaria neste novo contexto socioeconómico”.

Para a Xunta, os fondos europeos Next Generation son unha oportunidade para levar a cabo proxectos que xerarán empregos e para permitir unha renovación do Sistema Público de Emprego de Galicia. A Consellería de Emprego e Igualdade ten como obxectivo prioritario dixitalizar “por completo” este sistema, utilizando, para iso, a intelixencia artificial ou a analítica avanzada para conseguir adaptar a oferta de traballo á demanda empresarial. O reto é neste novo contexto sociolaboral detectar con tempo os novos nichos de traballo e as demandas do tecido empresarial para, a partir de aí, orientar a formación para o emprego cara os novos perfís laborais que se demanden.

Os fondos europeos, ademais, son para o Goberno galego unha oportunidade para adaptar a formación a través dunha aula dixital co propósito de que a cualificación dos traballadores cara os empregos de futuro sexa o máis rápida posible e chegue a todas partes, ao medio rural.

Next Generation nace para dar resposta a un novo contexto marcado pola covid-19 para facer fronte ao reto sanitario, económico, social e medioambiental. Galicia, neste senso, ten o traballo adiante para poder optar aos fondos, xa que presentou ao Estado unha selección inicial composta por un total de 108 iniciativas que mobilizarían máis de 9.400M€ grazas á colaboración público-privada.

Comentar noticia

Your email address will not be published.