Luís Villares esixe ao presidente da Xunta que deixe de perseguir e atacar aos discrepantes nos medios de comunicación públicos

O voceiro de En Marea esixiu ao presidente da Xunta, Alberto Núñez Feijóo, que por unha vez cumpra a Lei para o que é necesario que o Consello de administración da CRTVG aprobe o Estatuto profesional e o Consello de informativos e que se abra un proceso de diálogo entre os grupos parlamentares para renovar a Dirección xeral
Por o 26/09/2018 | Sección: En Marea,Política
Luís Villares esixe ao presidente da Xunta que deixe  de perseguir e atacar aos discrepantes nos medios de comunicación públicos
Compartir en:

O voceiro de En Marea, Luís Villares, quixo arrancar a súa intervención na sesión de control ao presidente da Xunta de Galicia no Parlamento de Galicia parabenizando a Ana Romaní, “profesional extraordinaria, directora do Diario Cultural, un paradigma de pluralidade, innovación e produción propia” e gañadora do Premio nacional de xornalismo 2018. “O máis patético é que vostede nin sequera sabe quen é, porque é o exótico presidente que presume de non ver a televisión nin escoitar a radio do seu propio país” afirmou Villares quen engadiu que “Ana Romaní é unha vítima da súa brutal represión exercida sobre a creación cultural libre, neste caso por medio da Radio Galega”.
Mentres a nivel estatal merece un prestixioso recoñecemento, en Galicia Sánchez Izquierdo, a voz do seu amo, elimina o seu programa, algo que como salientou Villares non ocorre só en Galicia, tamén Rusia por exemplo, gobernos persigue xornalistas disidentes, deses que contan a vedade, deses que o resto do mundo recoñece pola súa valía informativa e polo seu coraxe de non axeonllarse ante o Zar Putin” asegurou o voceiro de En Marea. “En Galicia, parecera que tiveramos a unha especie de Putin á galega, Alberto Putin Feijoo, o Zar dos Peares, que elimina o programa máis significativo e considerado desta emisora pública, O Diario Cultural.
Se o Zar dos Peares vise os informativos da televisión na que manda, vería que hai un disimulo continuo dos asuntos que poden afectar negativamente ao PP. Contar as cousas do revés non é informar. Contar as cousas como mellor lle convén ao PP é manipular” explicou o voceiro de En Marea. Para soster esta afirmación Luís Villares fixo referencia a tres exemplos concretos

  • O día da vaga de lumes, mentres media Galicia ardía e as autovías se convertían en trampas mortais para a xente, a Radio galega emitía Galicia en goles e a TVG repoñía Luar e Land Rover. SERVIZO PÚBLICO.

 

  • Corrupción. O día da sentenza Gurtel, o 25 de maio, a noticia ocupou 76 segundos no informativo do medio dia na TVG. A información non mereceu unha conexión en directo desde a Audiencia Nacional e obviou os detalles da condena ao PP, beneficiario a título lucrativo de 245.000 euro, e tamén o pasado dun dos condenados con máis pena, Pablo Crespo, como secretario de Organización do PP galego.

 

  • Corrupción de Feijóo. A Sentenza do Caso Campeón, que condenou a un deputado do PP baixo o seu mandato e a dous membros do goberno do Zar dos Peares, non mereceu unha soa peza da TVG en todo 2018, tal como se pode comprobar na súa páxina web

E mentres Feijóo mantén a súa actitude represiva o persoal da CRTVG “vai de negro cada venres por algo, porque non se compren os mínimos profesionais de equidade cando se trata de informar”. “A independencia, a veracidade e a obxectividade foron estranguladas sen contemplación nos medios de comunicación públicos polo Vladimir Putin galego é vostede un gobernante autoritario que non tolera a disidencia; un intolerante co pluralismo democrático, coa diversidade, coa discrepancia, coas opinións dos demais” afirmou o voceiro de En Marea.
No reino autoritario de Núñez Feijóo a xente non acepta pregarse á súa manipulación como salientou Villares. Por iso xornalistas da CRTVG que se senten cidadáns libres, dimiten, a costa do seu salario, para denunciar a manipulación do ZAR. “Tati Moyano e Alfonso Hermida, presentadores do Telexornal, decidiron dimitir dos seus postos para denunciar a manipulación informativa á que eran sometidos. Eles dimitiron para reivindicar o dereito de toda Galicia a recibir información veraz, para formar unha opinión pública libre” incidiu.

Pero o Zar Alberto Putin Feijoo non pode tolerar iso. E por iso por medio do ´rasputín galaico’,Sánchez Izquierdo deu instrucións de exercer a máis sucia das represións: sancionar a Tati Moyano por presentar unha gala benéfica contra o cancro, usando o pintalabios da TVG. “Non se pode ser máis cutre, máis miserable e máis machista” lamentou Luís Villares.
“Cando se vai dignar o Zar dos Peares a cumprir a Lei 9/2011, do 9 de novembro, dos medios públicos de comunicación audiovisual de Galicia, que obriga á creación dun consello de informativos, cuxo cometido é precisamente velar pola independencia, pola veracidade e pola obxectividade dos contidos informativos difundidos por todas as súas canles?” preguntoulle Villares ao presidente da Xunta de Galicia. “O Zar dos Peares rise á cara de todos os galegos, e non llo podemos consentir” concluíu a súa primeira intervención na sesión de control.

Na quenda de réplica o voceiro de En Marea recriminou a actitude de Núñez Feijóo coas mulleres asegurando que “so Zares nunca foron feministas”. Así pese a que o Decreto lexislativo 2/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de igualdade obrígao no seu art. 13 apartado D a crear unCódigo de boas prácticas tendente a transmitir o contido dos valores constitucionais sobre a igualdade entre homes e mulleres, a realidade é que a día de hoxe non existe.

“Vostede teme aos discrepantes. Por iso teme ás mulleres. Por iso lles puxo unha mordaza o 8 de marzo, o día da folga. E agora os tribunais veñen de condenar á Xunta por vulnerar o dereito fundamental á folga das mulleres” insistiu Villares.

O voceiro de En Marea rematou presentando unha serie de medidas para que o ´Zar` poda democratizar os medios de comunicación públicos. A primeira delas que o Consello de administración da CRTVG aprobe de maneira urxente o Estatuto profesional e o Consello de informativos para cumprir o que marca a Lei. E en segundo lugar, abrir un proceso de diálogo entre os grupos parlamentares para renovar a Dirección xeral do acordo co procedemento de elección que dispón a lei 9/2011 de medios. “Que lle parece ao Zar por unha vez, cumprir a lei?” concluíu Luís Villares.

Comentar noticia

Your email address will not be published.