Luís Villares: “Feijóo fai como unha lura botando tinta negra para que a xente non vexa os problemas e que é o que quere facer realmente con Galicia”

Por o 02/09/2016 | Sección: En Marea,Política,Vigo
Luís Villares: “Feijóo fai como unha lura botando tinta negra para que a xente non vexa os problemas e que é o que quere facer realmente con Galicia”

En Marea trasladouse hoxe á comarca do Barbanza para falar coa xente do mar dos problemas aos que se enfrontan diariamente e “fronte un Feijóo que fai como unha lura botando tinta negra para que a xente non vexa cales son os problemas e que é o que quere facer realmente con Galicia” como salientou o candidato á presidencia da Xunta de Galicia, Luís Villares. “Nós si vimos poñer solucións aos problemas do noso país” asegurou. Feijóo tentou impoñer unha lei de acuicultura absolutamente nefasta que afortunadamente hoxe está morta é enterrada grazas á mobilización de toda a xente do sector. En Marea propón pola contra unha alternativa para á elaboración dunha nova lei escoitando e en base a criterios científicos e un acordo co sector que achegue a súa experiencia.

O candidato á presidencia de En Marea salientou tamén os problemas do sector do cerco, cunha sentenza neste momento da Audiencia Nacional impugnada polo propio Ministerio na que se cuestionaban entre outras cuestións o reparto de cotas en base a criterios históricos. “Nós consideramos que non eran adecuados nin suficientes na medida en que houbo xente que optou por unha serie de paros para precisamente facer máis sustentable o sector é serían penalizados” explicou. Neste sentido, En Marea aposta por un sistema de cotas que no estea totalmente mercantilizado en relación a capacidade produtiva, que teña en conta todo o sector, a creación de emprego e a todas as empresas que dependen da viabilidade do reparto de cotas do cerco.

O sector do mar será unha prioridade para o futuro goberno de En Marea que impulsará o sector e traballará por poñer fin aos problemas provocados polo goberno de Núñez Feijóo. Entre as propostas de En Marea destaca tamén a elaboración dunha nova Lei de Costas para protexer o litoral, sen que isto supoña ir en detrimento do seu disfrute e explotación pero é preciso protexelo. Protexer o mar desde a costa, pero tamén o propio mar e as rías. Nas rías de Barbanza rexistraronse cos datos do mes de setembro, 169 puntos de vertido. Unha situación que ten que rematar e para a que En Marea conta cun programa de investimento que se dedicará ao saneamento das rías.