Máis de catro millóns de euros para contratar melloras de vías, campos de fútbol e o programa familiar de menores

O Concello adxudicou a mellora lumínica das parroquias de Canicouva e Ponte Sampaio, dúas melloras nas parroquias de Lérez e Campañó, a mellora da contorna do IES Torrente Ballester e o mantemento de dúas ferramentas informáticas municipais
Por o 01/03/2018 | Sección: Galicia,Pontevedra
Máis de catro millóns de euros para contratar melloras de vías, campos de fútbol e o programa familiar de menores

O Concello de Pontevedra aprobou en Xunta de Goberno Local extraordinaria a contratación de seis obras e o inicio de licitación doutras cinco por valor, todas elas, duns catro millóns de euros. Ademais, o Concello tamén aprobou nesa mesma Xunta a prórroga do Contrato da auga “polo tempo necesario, cun máximo de seis meses”.

As obras adxudicadas foron

• Adxudicación da mellora lumínica da parroquia da Canicouva e dos lugares de Acevedo e Rañadoiro, ambos en Ponte Sampaio, por valor de 195.415 euros á empresa Setga. A adxudicataria terá un prazo dun mes para executar a mellora, dende a sinatura do contrato, e incrementou en tres anos o mantemento da instalación que estaba fixado en cinco nos pregos.

Con esta actualización complétase o cambio a leds das parroquias de Ponte Sampaio e a Canicouva que suporán maior aforro enerxético, diminución de averías, menos CO2 ou a redución da contaminación lumínica. A seguinte parroquia pola que se continuará a substitución de luces leds será en Bora.

• Dous contratos de mantemento de ferramentas informáticas do Concello: as bases de datos por 13.729,87 euros/ano á empresa ASAC por catro anos máis a posibilidade de prórroga por dous máis; e o mantemento do xestor documental Alfresco por catro anos coa posibilidade de prórroga de dous máis, por valor de 91.581,51 euros polos catro anos, á empresa Queres tecnoloxías S.L.

• Outra adxudicación foi a rehabilitación do lugar da Fontaíña, na parroquia de Lérez, que realizará a empresa Covsa por 236.310 euros durante un prazo de catro meses. Ademais da rehabilitación total da vía, está previsto repoñer parte do saneamento, substituír a rede de auga nun tramo, mellorar a calidade das canalizacións existentes, e recollida de augas pluviais.

• Rehabilitación da vía que une Muíños e Ferreirós na parroquia de Campañó por valor de 75.500 euros, cun prazo de execución de tres meses e adxudicada á empresa E.C.Casas.

• Mellora da accesibilidade na contorna do IES Torrente Ballester. Foi adxudicada á empresa E.C.Casas por 240.000 euros e un prazo de execución de 4 meses. A actuación ten por obxecto mellorar a mobilidade peonil na zona, acadar un espazo público de calidade e potenciar o acceso peonil ao aparcadoiro disuasorio próximo ao centro de ensino. As obras previstas afectan ás rúas Herminia Fariña Cobián, Pintor Virxilio Blanco, Pintor Manuel Colmeiro, Bibiano Fernández-Osorio Tafall e Pintor Urbano Lugrís.

Os cruzamentos da rúa serán elevados, a un único nivel, a modo dunha pseudopraza, o que dará aire a zona. Ampliaranse as beirarrúas, que no caso de Herminia Fariña obrigarán a deixar un único carril de circulación (de saída) no 1º tramo que vai dende a avenida de Vigo á rúa Pintor Manuel Colmeiro. No 2º, ata a rúa Pintor Virxilio Blanco quedará de dobre circulación, de distribución de tráficos no barrio.

As obras que inician o proceso de contratación son

• Logo de corrixir un erro nos pregos de licitación, volve a saír a contratación do proxecto do Parque Infantil de Campolongo por valor de 300.000 euros e tres meses de adxudicación. Logo deste atraso, o Goberno confía en que se poida executar o proxecto a finais do verán. O proxecto propón tres zonas diferenciadas: unha para menores de seis anos; outra para maiores de seis anos con elementos como tirolina ou un tobogán duns 6 metros de altura, e unha zona de estar.

• Unha ferramenta para poder facer a contabilidade de custes no Concello (é dicir, saber o custe efectivo de cada actuación de cada servizo municipal). Será de 70.180 euros e un prazo de implantación de 18 meses.

• O plan de atención familiar a menores, que até o de agora o xestionaba Meniños sae a contratación por 99.000 euros/ano cun prazo de catro anos e a posible prórroga de outro máis. É un plan que no ano 2016 (pendente de recibir a memoria de 2017) atendeu a uns 90 menores de 60 familias.

• Aprobación da contratación do proxecto do campo de fútbol de herba sintética de Campañó por valor de 999.437,36 euros e un prazo de execución de 6 meses para construír un campo que cumpra os parámetros Fifa Quality. O Concello xa dispón dos terreos cedidos pola comunidade de montes para executalo.

• Aprobación da contratación do proxecto do campo de fútbol de Ponte Sampaio por valor de 1.397.120,20 euros e un prazo de execución de 6 meses.

O campo de Ponte Sampaio

A actuación en Ponte Sampaio é algo máis que a construción dun campo. É a recuperación de 15.000 metros cadrados, de todo o espazo que ocupa a instalación
deportiva actual para incorporala á Xunqueira como espazo de lecer e de praia.

Para iso o Concello comprou uns terreos de 11.000 metros cadrados próximos ao actual campo por 120.000 euros, onde se construirán as novas instalacións deportivas. O incremento do custe deste campo en relación aos anteriores débese a que hai que facer escavación e logo recheo da parcela do campo. No investimento tamén vai incluída a demolición do campo actual.
Proxéctase unha instalación de herba artificial e novas edificacións para vestiarios, aseos, cantina, bancada, enfermería e almacéns, así como a nova iluminación do campo e a urbanización de parte da parcela, moi próxima ao campo existente.

O campo de fútbol terá unha dimensións de 90 x 58 metros, coas bandas 93 x 61, e o pavimento deportivo deberá superar os parámetros de durabilidade máis esixentes e ter unha resposta deportiva das máis altas prestacións como o cumprimento da norma UNE-EN 15330-1:2014 e homologación do sistema para instalar marca FIFA recomended como da obra executada con nivel FIFA QUALITY.

En canto ás edificacións, trátase en realidade de dúas que envolven o campo, unha situada no linde oeste da parcela e outra no linde sur. A edificación situada no lado oeste intégrase na topografía adaptándose ao terreo e aos muros preexistentes, contando con cubertas vexetais. A edificación situada ao sur xoga coas referencias topográficas da parcela adoptando formas orgánicas que a relacionan coas outras edificacións, o terreo e os fondos. As dúas zonas ligadas ás edificacións independízanse para acoutar as zonas de público e de xogadores, así se dispoñen dous accesos que se especializan, o sur para publico ligado aos usos desta zona (cunha superficie de 326 metros cadrados) e o oeste para xogadores ligados á zona de vestiarios (cunha superficie de 295,30 metros cadrados). Propóñense solucións sinxelas, ordenadas, funcionais e, sobre todo, versátiles permitindo transformacións sinxelas de uso.

 

Noticias de última hora en Vigo

Comentar noticia

Your email address will not be published.