Máis de 1300 adolescentes participan no programa de dinamización lingüística ‘21 días co galego e +’

O secretario xeral de Política Lingüística e o director xeral de Educación, Formación Profesional e Innovación Educativa presentaron esta mañá a iniciativa no compostelán IES A Pontepedriña
Por o 14/01/2019 | Sección: Cultura
Máis de 1300 adolescentes participan no programa de dinamización lingüística ‘21 días co galego e +’

316 alumnas e alumnos de ESO, bacharelato e Formación Profesional comprométense a partir de hoxe, e ata o vindeiro 3 de febreiro, a falar só a lingua propia de Galicia. Fano no marco do programa de dinamización lingüística ‘21 días co galego e +’, que presentaron esta mañá no compostelán IES A Pontepedriña Valentín García, secretario xeral de Política Lingüística da Consellería de Cultura e Turismo, e Manuel Corredoira, director xeral de Educación, Formación Profesional e Innovación Educativa da Consellería de Educación, Universidade e Formación Profesional.

Valentín García puxo este programa en relación con outras accións que o seu departamento desenvolve para animar a mocidade a usar o galego e lembrou que Política Lingüística e a Dirección Xeral de Xuventude, Participación e Voluntariado están elaborando un plan de dinamización especificamente dirixido a este sector da poboación. Por outra banda, explicou que, con ‘21 días co galego e +’, Política Lingüística acolleu e fixo extensiva a 4 novos centros educativos unha iniciativa creada en 2013 no IES da Pobra do Caramiñal da man da profesora Pilar Ponte, “porque as accións que xorden desde a base, neste caso desde as persoas que traballan todos os días coa mocidade e a coñecen ben, son moitas veces as máis efectivas”. Neste caso, abundou o secretario xeral, “combaten algúns dos impedimentos que, segundo os expertos, lles impiden a mozos e mozas que desexan falar o galego dar o paso de facelo cos seus iguais: a rutina, certas convencións sociais, a falta de apoio ou a falta de reflexión sobre as propias decisións lingüísticas e as súas consecuencias”.

Pola súa banda, o director xeral de Educación, Formación Profesional e Innovación Educativa recordou “que o sistema educativo galego garante a competencia nas dúas linguas oficiais” e agradeceulle á comunidade educativa a súa implicación “en ideas e accións innovadoras coma esta, que fan posible que a lingua galega, ademais de se estudar e aprender nos centros, se dinamice por medio de propostas atractivas e orixinais coas que tamén se contribúe, desde o propio ámbito escolar ou familiar, á promoción do uso social do idioma”.

Canda os responsables da Xunta, participaron na presentación de ‘21 días co galego e +’ o presidente da Real Academia Galega, Víctor F. Freixanes; o director do IES, Francisco Javier Dapena, e a promotora e coordinadora do programa, Pilar Ponte.

Implicación de toda a comunidade educativa

95 docentes e 1.316 alumnas e alumnos da ESO, de bacharelato e de FP con idades comprendidas entre os 12 e os 18 anos dos institutos A Pontepedriña (Santiago de Compsotela), Antón Alonso Ríos (Tomiño), Ramón Otero Pedrayo (Ourense) e Francisco Daviña Rey (Monforte de Lemos) comprometéronse, no marco de ‘21 días co galego e +’, a falar soamente nesta lingua as 24 horas do día durante as 21 xornadas que dura o programa -é dicir, desde o 14 de xaneiro ata o 3 de febreiro de 2019- dentro e fóra do centro de ensino.

Deste xeito, agárdase que os rapaces e rapazas incrementen e perfeccionen o uso do galego e mais que reflexionen sobre a relación que teñen cos idiomas cos que entran en contacto, nomeadamente sobre a lingua propia de Galicia e o lugar que esta ocupa nas súas vidas. Aínda que o protagonista do programa é o alumnado, a iniciativa implica a toda a comunidade educativa: desde o profesorado ata o persoal de administración e servizos ou a ANPA e as familias, todos eles determinantes no éxito da proposta.

O soporte central da iniciativa é un blog, onde cada día aparecerá unha nova entrada coas tarefas que deberá realizar o alumnado e onde se poderán ver gravacións que deixarán constancia das reflexións dos rapaces e das rapazas sobre a experiencia. O 31 de maio, estudantes dos catro centros implicados no programa coñeceranse e compartirán experiencias na Xornada inquEDU que se celebrará na Cidade da Cultura de Galicia. Toda a información do programa está accesible na páxina web.

Comentar noticia

Your email address will not be published.