Manuel Lago cualifica de “artimaña electoralista” a iniciativa lexislativa de Feijóo para concederse un sumplemento de crédito de 48 millóns de euros

“Non se trata de superávit, senón da incapacidade de executar os créditos destinados a partidas tan necesarias coma o fomento do emprego, a vivenda e o I+D+i”
Publicado por o día 07/05/2019 na sección de En Marea,Política

Manuel Lago cualifica de “artimaña electoralista” a iniciativa lexislativa de Feijóo para concederse un sumplemento de crédito de 48 millóns de euros

Unha manobra de carácter publicitario da Xunta de Galicia”. Así cualificou o parlamentario de En Marea, Manuel Lago, o Proxecto de lei polo que se concede un suplemento de crédito para o reforzo de actuacións prioritarias para o ano 2019, trasladado hoxe ó Pleno da Cámara galega por parte do Goberno de Feijóo. “Estamos diante dunha modificación orzamentaria de escasa contía que non xustifica o balbordo xerado polo presidente da Xunta, 48millóns de euros, unha cifra menor, esta operación non deixa de ser unha mais das numerosas modificacións de credito que se fan de xeito ordinario todos os exercicios”.

Para En Marea, o goberno de Xunta está dándolle rango de lei a algo que poderían ter realizado pola vía da modificación de crédito e vén a demostrar “que a nosa proposta de orzamentos alternativos era realista e necesaria”. “Non se trata de superávit, senón de mala xestión, pola incapacidade de executar os créditos destinados a partidas tan necesarias coma o fomento do emprego”, engade Lago, para quen ” non se trata de novos recursos, senón de recursos mal gastados”.

Pero o máis grave para o parlamentario de En Marea é que este suplemento de crédito non chega para paliar os problemas da sanidade, da educación e dos servizos sociais do noso país. “Os recursos para atender os servizos públicos deste país son claramente insuficientes, faise imprescindible aumentar os seus recursos” insistiu Lago, que dixo que “hoxe vén a darnos a razón e faino cun procedemento de tramitación que debería poñernos en alerta”.

E sinalou que en lugar de traer ao Parlamento esta iniciativa lexislativa Feijóo debería derrogar a Lei de estabilidade orzamentaria “da que vostede é pai intelectual”, comentoulle ao conselleiro de Facenda. “Esa norma e maila Lei Montoro é urxente derrogalas”, lembrou Lago, pois considéraas responsables do “conflito permanente no que padecen os concellos dende hai anos. “O Proxecto de Lei que van aprobar supon unha impugnación da arquitectura da austeridade, ese marco imosto pola Troika a partir de 2010”, concluiu.

En Marea votou a favor das emendas de PSdeG e BNG e abstívose na votación do Proxecto de Lei polo que se concede un suplemento de crédito para o reforzo de actuacións prioritarias para o ano 2019, que foi aprobado coa maioría do Grupo Popular.

Comentar noticia

Your email address will not be published.