Manuel Lago: “Feijóo é un covarde por non comparecer para explicar como se vai poñer freo á crise de Endesa”

O deputado anunciou na rolda de prensa posterior á Xunta de Voceiros que a pregunta que o seu Grupo levará ao próximo Pleno versará sobre o proceso de desindustrialización de Galicia
Publicado por o día 01/10/2019 na sección de Grupo Común da Esquerda,Política

Manuel Lago: “Feijóo é un covarde por non comparecer para explicar como se vai poñer freo á crise de Endesa”

Manuel Lago compareceu esta mañá en rolda de prensa no Parlamento de Galicia tras asistir á Xunta de Voceiros e anunciou que o Grupo Común da Esquerda preguntará a Feijóo no vindeiro pleno pola situación de desindustrialización do país. Abordou tamén o anuncio da desestimación por parte de Feijóo da solicitude dos grupos da oposición de que comparecese para explicar que actuacións levaría a cabo a Xunta para evitar o peche inmediato de Endesa: “Feijóo é un covarde, porque se pediu a súa comparecencia para falar da crise de Endesa, que ten preocupada á comarca de Ferrol-As Pontes e el non se atreve a comparecer e envía ao Conselleiro de Economía e Industria para que compareza no seu lugar. Parécenos lamentable, este é un problema gravísimo para o país, que non é exclusivamente sectorial e non corresponde simplemente a unha Consellería. Parécenos un desprezo enorme ao Parlamento e ás persoas de Ferrol e As Pontes que están contemplando con angustia o seu futuro. Non sei que cousas máis importantes ten que facer Feijóo ese día ca iso”, manifestou o voceiro do Grupo Común da Esquerda.

No que respecta á pregunta ao presidente que Antón Sánchez enunciará no Pleno da próxima semana, Lago explicou que versará sobre “o imparable proceso de desindustrialización e desertización industrial do noso país”. “Non só se despoboa o rural, desertízanse territorios, e queremos saber como se vai mellorar a política industrial do noso país”, engadiu. “Ninguén lle fixo tanto dano á industria na historia de Galicia coma Feijóo. É o presidente da desindustrialización. A lista é interminable: Endesa, Meirama, o naval, Poligal, Isowat, Ferroatlántica, o aluminio… A acumulación de conflitos, empregos en perigo e fábricas en situación de inestabilidade non se coñecía no noso país desde hai décadas”, denunciou Lago, que tamén lembrou que a situación “non é conxuntural” pois “desde que goberna Feijóo se perderon en Galicia 22.000 empregos industriais e Galicia é a 2ª comunidade autónoma con peor desenvolvemento industrial na última década”.

“Queremos denunciar a enorme irresponsabilidade e apatía, por non dicir complicidade, do Goberno Feijóo. Hoxe están en crise os estaleiros de Vigo: Vulcano pechado e camiño da desaparición, e Barreras está nun proceso que, se non hai unha intervención pública, vai rematar nunha situación societaria de difícil solución”, continou o deputado. “Barreras sintetiza perfectamente o que é a política industrial da Xunta de Galicia, xa que se vendeu a capital estranxeiro, a PEMEX, que é o accionista de referencia. Barreras foi dirixida por amigos do PP, non por persoas cualificadas para darlle unha xestión eficiente, polo que Feijóo é responsable directo da situación na que hoxe se atopa o estaleiro”, agregou.

Ademais do declive do sector naval, Lago abordou tamén o da produción de enerxía térmica. “Hai un consenso mundial sobre a descarbonización na xeración de enerxía, e todos sabemos que en Meirama e nas Pontes antes ou despois se ía rematar a produción de enerxía eléctrica queimando carbón. A responsabilidade da Xunta tería que ter sido poñer os medios para buscar proxectos industriais alternativos que desen emprego ás persoas directamente empregadas nas compañías e que servisen tamén de núcleo industrial para que esas empresas tivesen futuro. Hoxe As Pontes enfróntase á ameaza da desertización por culpa da Xunta”, afirmou o parlamentario. “Nós compartimos unha frase que din os sindicatos, que é que estamos nun momento de emerxencia industrial. O Grupo Común da Esquerda está a carón dos traballadores e traballadoras do noso país, que contemplan con preocupación o futuro dos seus postos de traballo, e dos territorios e das comarcas afectadas que defenden ter un futuro industrial”, finalizou.