Marea de Vigo rexistra unha moción pedindo a reprobación do rei emérito e da monarquía como institución obsoleta.

Oriana Méndez: “Estamos diante de escándalos dunha magnitude tal que está quedando en evidencia a natureza parasitaria da institución monárquica”.
Publicado por o día 07/08/2020 na sección de Galicia,Marea Vigo,Política,Vigo

Marea de Vigo rexistra unha moción pedindo a reprobación do rei emérito e da monarquía como institución obsoleta.

No primeiro acordo da moción rexistrada pola Marea de Vigo pídese que o Concello de Vigo “esixa a celebración dun referendo no que a cidadanía decida sobre a continuidade da monarquía como depositaria da Xefatura do Estado”.

“Coa fuxida do rei emérito Juan Carlos I, no medio dun proceso xudicial aberto tras facerense públicas as numerosas manobras que deixan cada vez menos dúbidas sobre a súa responsabilidades nunha profunda trama de corrupción, o descrédito da monarquía xa se converteu nun clamor popular” asegura Oriana Méndez, concelleira da Marea de Vigo. “Estamos diante de escándalos dunha magnitude tal que está quedando en evidencia a natureza parasitaria da institución monárquica, está quedando en evidencia que a principal función da monarquía é perpetuarse no tempo, enriquecéndose grazas ao esforzo da maioría social, e sendo inútil para o progreso, a igualdade e a prosperidade desa mesma maioría social” enfatiza a concelleira.

O 11 de xuño o Grupo municipal da Marea de Vigo rexistrara unha petición no Concello co fin de mudar o topónimo da Praza do rei, polo anterior, Campo de Granada; e retirar o busto de Juan Carlos I da recepción do Concello de Vigo. “Hoxe, 7 de agosto, é necesario ir un paso máis alá e por iso propoñemos que o Concello de Vigo exixa a celebración dun referendo onde a cidadanía poida decidir. Propoñemos tamén que o Concello de Vigo inste ao Goberno do Estado e ao Congreso das Deputadas a que inicien unha investigación parlamentaria polas accións realizadas por D. Juan Carlos de Borbón e a derrogar o delito de inxurias ao rei e á Casa Real recollidos nos artigos 490.3 e 491 do CP. De aprobarse os delitos que se investigan, tamén pedimos o reingreso as arcas públicas do patrimonio adquirido ilegalmente polo rei emérito. Por último, instamos a todas as administracións, a comezar polo Concello de Vigo, tal e como fixemos o pasado 11 de xuño, a retirar calquera honra ou titulo honorífico que ostente Juan Carlos de Borbón”