Marea de Vigo rexistra unha moción pola saúde da lingua galega

Oriana Méndez: “Nestes momentos a cidadanía galega, e a do estado español no seu conxunto, estamos a vivir unha ofensiva por parte da dereita e a ultradereita contra a realidade plurilingüe e pluricultural característica do estado. Unha ofensiva baseada en argumentos falsos contra a necesaria promoción e dinamización, no noso caso, da lingua galega”.
Publicado por o día 23/11/2020 na sección de Galicia,Marea Vigo,Política,Vigo

Marea de Vigo rexistra unha moción pola saúde da lingua galega

Marea de Vigo vén de rexistrar unha “moción pola saúde da lingua galega”, na que o grupo insta ás diferentes administracións a cumprir a lexislación en canto ao uso da lingua, a súa promoción e o orzamento necesario. Ante as recentes manifestacións por parte da dereita co gallo da reforma educativa, a formación municipalista afirma que “A supervivencia do castelán en todo o estado non está en perigo, os datos son teimudos e a realidade o é máis. Mais constatamos cos nosos propios ouvidos que a supervivencia do galego si que está en perigo, e estao na nosa cidade, en Vigo” afirma Oriana Méndez, concelleira da Marea de Vigo.

“Malia toda a lexislación existente en materia de normalización e dinamización lingüística – prosigue a concelleira -, as vulneracións reiteradas desta normativa e a ausencia de investimento en políticas eficaces que favorezan o uso do galego semellan estar detrás dunha situación na que preto do 75% da rapazada galega, entre os 5 e os 14 anos fala só castelán, ou máis castelán que galego”.

Máis concretamente, no caso da nosa cidade, e segundo os datos do Instituto Galego de Estatística, Vigo é a cidade na que menos uso se fai do galego. Só un 15,4% da poboación daría a suma de ‘só galego’ e ‘máis galego que castelán’ no seu uso lingüístico. “Polo tanto, a evolución dos últimos anos apunta cara a conclusións demoledoras. Todos os estudos sinalan o que calquera veciña pode percibir na rúa: o uso do galego será residual ou anecdótico para as vindeiras xeracións de vigueses e viguesas” incide a concelleira.

Ante isto, desde Marea de Vigo “propoñemos unha moción cunha serie de acordos que consisten en instar á Xunta á restitución do orzamento recortado durante os últimos 10 anos, incrementando as partidas dirixidas a promoción da lingua, a derrogar o Decreto 79/2010, do 20 de maio, para o plurilingüismo no ensino non universitario de Galicia e ao cumprimento do disposto no Plan Xeral de Normalización da Lingua Galega” explica Oriana Méndez. Do mesmo xeito, Marea de Vigo insta ao Goberno local a cumprir a Ordenanza de Normalización Lingüística do Concello de Vigo, relativo ao uso do galego por parte dos cargos institucionais no seu exercicio do cargo e á Concellería responsable á convocatoria do Consello Social da Lingua, órgano do Concello para o asesoramento en política lingüística.

Comentar noticia

Your email address will not be published.