En Marea denuncia que a Comisión de Expertos sobre transición enerxética está composta só por homes

Yolanda Díaz enviou hoxe unha carta ao Ministro de Enerxía para solicitar unha redefinición da composición deste órgano.
Publicado por o día 04/08/2017 na sección de En Marea,Galicia,Política

En Marea denuncia que a Comisión de Expertos sobre transición enerxética está composta só por homes

A voceira de En Marea no Congreso dos Deputados e Portavoz do Grupo Confederal na Comisión de Enerxía, Turismo e Axenda Dixital, Yolanda Díaz, envioulle hoxe unha carta ao Ministro de Enerxía, Álvaro Nadal, para expresarlle a preocupación en relación coa composición final da Comisión de Expertos sobre escenarios de transición enerxética. Díaz denuncia que dos 14 integrantes da mesma, os 14 son homes e que non se invitaron a formar parte da mesma ás organizacións ecoloxistas máis relevantes nin ás organizacións sociais especializadas en política enerxética a facer as súas propias nominacións. Pola contra, si participaban persoas destacadas, por exemplo, de Red Eléctrica de España e Iberdrola.

A voceira de En Marea manifestou que en ningún caso se xustifica que unha comisión de expertos estea formada só por homes. Nin representa a realidade social nin a do propio sector enerxético. E nin tan sequera debería xustificarse a necesidade de emendar esta situación.

Por estas estas razóns Yolanda Díaz proponlle na carta enviada esta mañá ao Ministro de Enerxia, a posibilidade de abrir un diálogo cos grupos parlamentarios con representación no Congreso para redefinir a composición da comisión de expertos, garantindo a presenza de mulleres e de representantes elexidos directamente polas ogranizacións sociais.